VOLEYBOL

----------------

"Gəncə" Azərbaycan çempionatında debütünü məğlubiyyətlə qeyd edib

Bu günsə kişi voleybolçular meydana çıxacaqlar

Dünən qadın voleybolçular arasında Azərbaycan çempionatının Yüksək Liqasında bir oyun keçirilib. Söhbət Gəncə Olimpiya İdman Kompleksində baş tutan "Gəncə" - "Murov Az Terminal" qarşılaşmasından gedir. Gəncənin eyni adlı klubunun debüt etməsindən öncə yerli komandanın Yüksək Liqada mübarizəyə başlaması və həmçinin ölkə çempionatının oyunlarının paytaxtla yanaşı bölgələrdə də təşkil edilməsi münasibətilə təntənəli mərasim keçirilib. İlk dəfə voleybol üzrə ölkə birinciliyinin oyunlarına ev sahibliyi edən Gəncə OİK-nin tribunaları yerli azarkeşlərlə dolu olub. Azərbaycan Voleybol Federasiyasından verilən məlumata görə, tədbirdə sözügedən qurumun prezidenti Şahin Bağırov, Gəncə şəhər İcra Hakimiyyətinin başçısı Niyazi Bayramov, digər rəsmi qonaqlar və federasiyasının nümayəndələri iştirak ediblər.

Oyuna gəlincə, qarşılaşma qonaqların üstünlüyü ilə keçib. Bakı klubu hər üç setdə üstün olmaqla quru hesablı qələbəyə nail olub - 3:0 (25:18, 25:17, 25:18).

Yeri gəlmişkən, bu gün və sabah isə kişi voleybol klubları arasında növbəti oyunları keçiriləcək. Artıq həmin oyunları keçirilcəyə məkan və vaxt dəqiqləşib.

Bu gün Yüksək Liqada MOİK-lə “Neftçi” ilə üz-üzə gələcək. Oyun saat 18:00-da başlayacaq.

Noyabrın 23-də isə ilk olaraq meydana “Azərreyl” və “Murov Az Terminal” komandaları çıxacaq. Matç saat 16:00-da başlayacaq. Günün növbəti qarşılaşması isə “Xarı Bülbül Şuşa” və “Xarı Bülbül Laçın” klubları arasında olacaq. Həmin oyunsa saat 19:00-da başlayacaq bu oyun “CBC Sport” kanalı vasitəsilə canlı yayımlanacaq.

Görüşlər Bakı Voleybol Mərkəzində keçirilcəck.

İNTİQAM Məmmədov