Cüdo

----------

Aydan Vəliyeva Okeaniya turnirində üçüncü olub

Bu gün Avstraliyanın Perte şəhərində kişi və qadın cüdoçular arasında Açıq Okeaniya turnirinə start verilib. İki gün keçiriləcək bu turnirdə Azərbaycan da daxil olmaqla 64 ölkəni təmsil edən 299 tatami ustası medallar uğrunda mübarizə aparacaq. Azərbaycan Cüdo Federasiyasından verilən məlumata görə ölkəmiz bu turnirə məşqçilər Elçin və Elnur İsmayılovlarin rəhbərliyi altında üçü qadın olmaqla 8 cüdoçu ilə qalib ki, onlarda 5 çəkidə iştirak edəcəklər. 

Bu gün təmsilçilərimizdən altısı artıq çıxışını başa vurub. Onlardan isə yalnız Aydan Vəliyeva mükafatçılar sırasında yer tuta bilib. Qeyd edək ki, 52 kq- da tatamiyə çıxan cüdoçumuz startda Argentina təmsilçisini, ardından isə ABŞ və Polşa idmançısını məğlub edərək yarımfinala yüksəlib. Di gəlki, cüdoçumuz burada ispaniyalı rəqibinə uduzaraq, finaldan kənarda qalıb. Daha sonra isə o, bürünc medal uğrunda görüşdə almaniyalı Annik Vurfeli üstələyərək üçüncü yeri tutub. Təəssüflər olsun ki, onunla eyni çəkidə çıxış edən və turnirdə onun getdiyi yolu gedən Gültac Məmmədeliyeva bürünc medal uğrunda görüşdə polşalı Aleksandre Kalete ilə bacarmayıb. Nəticədə də çıxışını medalın bir addımlığında bitirib. 

Start günü mübarizəyə qatılan digər təmsilcilərimizə gəlincə, Fidan Əlizadə (57 kq), Kamran Süleymanov (66 kq), eləcə də 73 kq-da tatamiyə çıxan cüdoçularımız - Rəşid Məmmədəliyev və Nurlan Osmanov turnirlə əliboş vidalaşıb.

Sabah 90 kq çəki dərəcəsində daha iki cüdoçumuz tatamiyə çıxacaq.

Turnirin əsasnaməsinə uyğun olaraq hər çəkidə ilk üç yeri tutan cüdoçu aktivinə müvafiq olaraq 700, 490 və 350 reytinq xalı yazdıracaq.

İNTİQAM Məmmədov