MİNİ-FUTBOL

--------------------------

Yığmamız DÇ-2023-ü 4-cü yerdə bitirib

Avropa çempionu adını daşıyan Azərbaycan millisi Macarıstanla bacarmayıb

BƏƏ-də mini-futbol üzrə keçirilən və Azərbaycan yığmasının da iştirak etdiyi dünya çempionatına bu gün həlledici final və 3-cü yer uğrunda keçirilən oyunlarla yekun vurulub. Qeyd edək ki, mundialda bürünc medal uğrunda keçirilən oyunda Azərbaycan millisi ilə Macarıstan komandası qarşılaşıb. Təəssüflər olsun ki, baş məşqçisi Elşad Quliyev olan və hazırda Avropa çempionu adını daşıyan Azərbaycan millisi dünən finala çıxışda olduğu kimi bürünc medal uğrunda həlledici matçda da meydanı məğlub durumda tərk edib - 1:3 (0:2). Bununla da millimiz tarixində ilk dəfə qatıldığı dünya çempionatını 4-cü pillədə başa vurub. Xatırladaq ki, heyəti Davud Kərimi, Ağaseyid Qasımov, Tural Nərimanov, Təmkin Xəlilzadə, Taleh Babayev, Vüsal İsayev, Mirmehti Rzayev, Vəli Qafarov, Rəvan Kərimov, Aleksandr Şemonayev, Rizvan Fərzəliyev, Eıvin Əlizadə, Seymur Məmmədov, Mirkamil Cəfərov və Eşqin Tağıyevdən ibarət olan Azərbaycan millisi mundialın qrup mərhələsində (G qrupu) İrak (2:0), Misir (4:1) və Küveyti (3:1) məğlub edərək qrup lideri kimi mundialın 1\8 finalına yüksəlib. Bu mərhələdə Portuqaliya millisini 3:0 hesabla üstələyən yığmamız 1\4 finalda isə Bolqarıstanı 3:1 hesabla məğlub etməklə yarımfinala qalxıb. Di gəl ki, bundan sonra Elşad Quliyevin komandası qələb qazana bilməyib. Finala çıxışda Qazaxıstana 2:3 hesabla uruzaraq çempionluq şansını itirən yığmamız daha sonra isə üçüncü yer uğrunda keçirdiyi görüşdə də məğlub olaraq, debüt etdiyi dünya çempionatını medalın bir addımlığında başa vurub. 

İNTİQAM Məmmədov