MİNİ-FUTBOL

------------------

Azərbaycan yığması mundialın yarımfinalında büdrəyib

BƏƏ-də mini-futbol üzrə keçirilən və Azərbaycan yığmasının da öz tarixində ilk dəfə qatıldığı dünya çempionatı artıq finişə yaxınlaşıb. Bu gün mundialda yarımfinal mərhələnin oyunları keçirilib. İki yarımfialın birində Elşad Quliyevin başçılıq etdiyi Azərbaycan yığması Qazaxıstan millisi ilə qarşılaşıb. Təəssüflər olsun ki, mundialın əvvəlindən bir dəfə də olsun məğlubiyyətin acısını dadmayan və keçirdiyi beş oyunun hamısını qələbə ilə bitirən yığmamız Qazaxıstanla qarşılaşmada büdrəyib - 2:3. Yığmanın heyətində hər iki qolu Eşqin Tağıyev (18 və 50-ci dəq)  vurub. Maraqlıdır ki, Azərbaycan hesabı açandan sonra öz qapısından 3 qol buraxıb. Yalnız 50-ci dəqiqədə bu qollardan birinin əvəzini çıxa bilib. Bu isə yığmamızın məğlubiyyətdən yaxa qurtarmasına bəs etməyib.

Beləliklə, yarımfinalda büdrəyən Azərbaycan yığması sabah Macarıstanla 3-cü yer uğrunda qarşılaşacaq. Finalda isə Qazaxıstanla Rumıniya üzləşəcək. Xatırladaq ki, mundiala ilk dəfə qatılan və hazırkı avropa çempionu adını daşıyan Azərbaycan yığması yer aldığl G qrupunda İrak (2:0), Misir (4:1) və Küveyti (3:1) məğlub edərək qrup lideri kimi pley-offa (1\8 final) keçib. Burada Portuqaliyanı (3:0) və ardından (1\4-də) Bolqarıstanı (3:1) məğlub edərək yarımfinala yüksəlib. Di gəl ki, Avropa çempionu adını daşıyan yığmamız həlledici fianlın bir addımlığında büdrəyib. 

İNTİQAM Məmmədov