CÜDO

---------------

Cüdoçularımız mundialın 4-cü gününü medalsız başa vurublar

Ramazan Əhmədov DÇ-da çıxışını medalın bir addımlığında bitirib

Portuqaliyanın Odivelaşe şəhərində gənc cüdoçular arasında keçirilən və Azərbaycan təmsilçilərinin də iştirak etdiyi dünya çempionatında bu gün fərdi yarışlara yekun vurulub. Təəssüflər olsun ki, mundialın ilk 3 günündən fərqli olaraq, 4-cü günü cüdoşularımız medalsız qalıblar. Qeyd edək ki, mundialın bu günə təsadüf edən 4-cü günündə ikisi qadın olmaqla, üç təmsilçimiz tatamiyə çıxıç. Bunlardan isə yalnız +100 kq-da mübarizə aparan Ramazan Əhmədov medal qazanmağa yaxın olub. Mübarizəyə qatıldığı 1\16 finalda Tacikistan, 1\8-də Rumıniya, 1\4-də isə Polşa təmsilçisini məğlub edərək yarımfinala yüksələın Əhmədov burada köhnə rəqiblərindən olan türkiyəli İbrahim Tataroğluna məğlub olub. Bu məğlubiyyətdən sonra o, bürünc medal uğrunda güləşməli olub. Di gəl ki, bu dəfə də onun medala aparan yolunu Türkiyənin digər idmançısı - Munir Ərtuqu kəsib. Bununla da cüdoçumuz çıxışını medalın bir addımlığında başa vurub. Bir maraqlı məqamı qeyd edək ki, bu ilin iyun ayında gənclər arasında eyni məkanda keçirilən  Avropa çempionatının finalında Ramazan Əhmədov məhz türkiyəli Tataroğlunu məğlub edərək Avropa çempionu olmuşdu. Bu dəfə isə... Qadın təmsilçilərimizə gəlincə, həm Nərmin Əmirli (78 kq), həm də Nigar Süleymanova (+78 kq) ikinci görüşündə məğlubiyyətlə üzləşərək mübarizəni erkən dayandırıb. Bununla da Azərbaycan yığması dünya çempionatının 4 günlük fərdi yarışını üç medalla (1-2-0) başa vurub. Vüsal Qəlndərzadə (73 kq) qızıl. Nizami İmranovla (60 kq) Vüqar Talıbovsa (90 kq) gümüş medal qazanıb. 

Sabah isə mundialda qarışıq  komanda yarışı keçiriləcək. Bununla da gənc cüdoçuların 5 günlük dünya çempionatına yekun vurulacaq. 

İNTİQAM Məmmədov