CÜDO

-----------

Vüqar Talıbov dünya ikincisi olub

Portuqaliyanın Odivelaşe şəhərində gənc cüdoçular arasında keçirilən və Azərbaycan təmsilçilərinin də iştirak etdiyi dünya çempionatı davam edir. Çempionatın bu günə təsadüf edən 3-cü günü yığmamızın üç üzvü -  Ömər Rəcəbli, İsmayıl Zamanov (hər ikisi 81 kq) və Vüqar Talıbov (90 kq) tatamiyə çıxaraq medallar uğrunda mübarizəyə qatılıb. Triomuzdan yalnız Talıbov mükafatçılar sırasında yer ala bilib. Qeyd edək ki, yalnız finalda büdrəyən Vüqar Talıbov çıxışını ikinci yerdə başa vurmaqla gümüş medala layiq görülüb. Müvafiq ardıcıllıqla Rumıniya. Tacikistan, Latviya və İspaniya təmsilçisini məğlub edərək finala yüksələn cüdoçumuz burada yaponiyalı Komei Kavabate ilə bacarmayıb. 

Ömər Rəcəbli isə 3 qələbədən sonra 1\4 finalda məğlub olaraq mübarizəni təsəlliverici görüşlərlə davam etdirib. Burada özbəkistanlı rəqibi Akxrora Ziyadullayevi məğlub etsə də. bürünc uğrunda qarşılaşmada yaponiyalı Naoto İzaveylə bacarmayıb və bununla da çıxışını medalın bir addımlığında başa vurub. 

İsmayıl Zamanov isə ilk iki qələbədən sonra 1\8 finalda məğlubiyyətələ üzləşib və bununla da mübarizəni erkən dayandırıb. 

Xatırladaq ki, çempionatın ilk günündə Nizami İmranov (60 kq) bürünc, ikinci gün isə Vüsal Qələndərzadə (73 kq) qızıl medal qazanıb. Beləliklə də Azərbaycan yığması 3 gündən sonra bir dəst (1-1-1) medal qazanıb. 

Sabah fərdi yarışlara yekun vurulacaq. Ertəsi günsə qarışıq komanda yarışı keçiriləcək. Bununla da çempionata yekun vurulacaq. 

İNTİQAM Məmmədov