Şahmat

-----------

Rəcəbov əvvəlki mövqeyində qalib, Məmmədyarov isə....

Beynəlxalq Şahmat Federasiyası (FİDE) şahmatçıların yeni reytinq cədvəlini elan edib. Qeyd edək ki, kişi şahmatçılar arasında Top-100-də yer alan Azərbaycan şahmatçılarından ən yaxşı göstərici Teymur Rəcəbova (2745 reytinq xalı) məxsusdur. O, əvvəlki kimi yenə də 14-cu sırada yer alıb. Ondan fərqli olaraq, Şəhriyar Məmmədyarov (2734) bir pillə geriləməklə 17-ci yerə düşüb. Top -100-də yer alan daha bir təmsilçimiz, bu ilin yayında Bakıda keçirilən Dünya Kubokunda dördüncü yeri tutan Nicat Abbasov (2677) isə 59-dan 58-ə yüksəlib. 

Kişilərin reytinq cədvəlində ilk üç yeri müvafiq ardıcıllıqla Dünya Kubokunun qalibi Maqnus Karlsen (2839, Norveç), Fabiano Karuana (2786, ABŞ) və Çin şahmatçısı Dinq Liren (2780) tutur. 

Qadinlara gəlincə, kişilərdən fərqli olaraq, qadınların Top-100-undə 4 həmyerlilərimiz qərar tutub. Onların arasında da ən yaxşı nəticəni Günay Məmmədzadə (2442) göstərir ki, o da 34-cu yerdədir. Aktivində 2387 xalı olan Ülviyyə Fətəliyeva 56-ci, Gövhər Beydullayeva 2383 xalla 66-ci yerdədir. Maraqlıdır ki, ilk yüzlüyü isə 2346 xalla Gülnar Məmmədova tamamlayır. 

Zərif cinsdən olan şahmatçıların reytinq cədvəlinə gəlincə, burada ilk üçlükdə Çin təmsilçiləri Xou İfan (2628), Yu Vencjun (2560) və Bakıda keçirilən Dünya Kubokunun qalibi adını qazanan rusiyalı Aleksandra Qoryackina yer alıb.

İNTİQAM Məmmədov