Kikboksinq

------------------

Kikboksçuların Azərbaycan çempionatı başa çatıb

Qalibləri qarşıda dünya çempionatı gözləyir

Sentyabrın 22-də Bakı İdman Sarayında kişilər və kadetlər  arasında kikboksinqin WAKO versiyası üzrə startı verilən Azərbaycan çempionatına bu gün baş tutan həlledici final döyüşləri ilə yekun vurulub. Qeyd edək ki,  Azərbaycan Kikboksinq Federasiyasının yaranmasının 30 illiyinə həsr edilən və sayca 27-ci olan bu çempionatda 92 komandanı təmsil edən 750 idmançı medallar uğrunda mübarizə aparıb ki, onlardan da 150-ci kişilər olub. Üç gün davam edən bu çempionatda əsas məqsəd ölkə yiqmasinin heyətini müəyyənləsdirmək olub. Yeri gəlmişkən, yığmamız noyabr ayında Portuqaliyanın paytaxtı Lissabonda keçiriləcək WAKO versiyası üzrə dünya çempionatında iştirak edəcək. Yeri gəlmişkən, bu Azərbaycan çempionatda demək olar ki, ölkənin bütün titullu idmançıları, həm çempionluq, həm də yığmadakı mövqelərini qorumaq üçün mübarizə aparıblar. 

Çempionatın ən maraqlı final döyüşlərindən biri 57 kq çəki dərəcəsində çıxış edən Anar Məmmədovla (DÇ-ının və İslam Oyunlarının qalibi) Mahmud Hüseynov (DÇ mükafatçısı və AÇ-nın qalibi) arasında baş tutub. Gərgin keçən döyüş daha təcrübəli Məmmədovun qələbəsi ilə bitib. Dünya çempionu adını daşıyan Amin Quliyevlə (60 kq) dünya çempionatının mükafatçısı Elcan Tanrıverdiyev arasındakı döyüş də öz gərginliyi ilə diqqətçəkən qarşılaşma kimi yadda qalıb. Bu cütlüyün qarşılaşmasında qalib adını Amin qazanıb. 

Digər çəkilərə gəlincə, 51 kq-da Sübhan Məmmədov (DİN), 54 kq-da Elvin Məmədov (Avropa çempionu, DİN), 63,5 kq çəki dərəcəsində Qiyas Səməndərov (ilk raundda nokautla), 67 kq-da Dünya Kubokunun sahibi Arzuman Qədimov (Naxçıvan klubu), 71 kq çəkidə Ruslan Musayev, 75 kq-da "Samux" klubunun təmsilçisi Elxan Əliyev, 81 kq-da Elşad Şahbazov ("Sərhədçi"), 86 kq-da Elşən Alıkişiyev ("Sərhədçi"), 91 kq-da Orxan Məmmədov və +91 kq çəki dərəcəsində Xəyal Aslanov 27-ci Azərvaycan çempionatının qalibi adına layiq görülüb. 

İNTİQAM Məmmədov