VOLEYBOL

--------------------------

Məşqçilərə FIVB-nin Level 2 dərəcəli beynəlxalq sertifikatlar verilib

Sentyabrın 11-dən 15-nə kimi Beynəlxalq Voleybol Federasiyasının (FIVB) və Azərbaycan Voleybol Federasiyasının (AVF) birgə təşkilatçılığı ilə Bakıda voleybol məşqçiləri üçün Level 2 seminarı keçirilib. Yerli və xarici mütəxəssislərin, həmçinin qadın voleybolçulardan ibarət millimizin üzvlərinin iştirak etdiyi seminara türkiyəli Çengiz Akarçeşmə rəhbərlik edib. Onun asistenti isə daha öncə FIVB-nin məşqçilik sertifikatı almış, çimərlik voleybolu üzrə məşqçi Nihad Tanrıverdiyev olub.

Seminar nəzəriyyə və təcrübədən ibarət olub. Gənclər və İdman Nazirliyinin Voleybol Mərkəzində təşkil olunan seminarın sonuncu günündə mütəxəssislər nəzəri, ardınca isə praktiki imtahanda iştirak ediblər. Seminarın hər bir iştirakçısı imtahanlardan uğurla keçərək FIVB-nin Level 2 dərəcəli beynəlxalq sertifikatına layiq görülüb.

Daha sonra seminarın bağlanış mərasimi keçirilib. Tədbirdə AVF-nin vitse-prezidenti Bəhruz Quliyev, baş katib Faiq Orucov, türkiyəli Çengiz Akarçeşme və digər qonaqlar iştirak ediblər.

Tədbirin sonunda iştirakçılara sertifikatlar təqdim olunub və xatirə şəkli çəkdirilib.

Qeyd edək ki, 3-7 iyul tarixlərində Bakıda FIVB-nin Level 1 seminarı keçirilib. Noyabrda isə paytaxtda FIVB Level 3 beynəlxalq seminarının keçirilməsi nəzərdə tutulur.

İNTİQAM Məmmədov