HƏNDBOL

----------------------

Həndbol klublarımız Avrokuboklara hazırlığı davam etdirirlər

Kişi və qadınlardan ibarət həndbol klublarımız məşqləri davam etdirirlər. Azərbaycan Həndbol Federasiyasından verilən məlumata görə, Avropa Həndbol Federasiyası (EHF) kuboku uğrunda yarışlarda iştirak edəcək təmsilçilərimiz avqustun 15-dən hazırlıq prosesinə başlayıblar.

Artıq qadınlardan ibarət klublarların Avrokubokdakı oyunlarının keçirilmə vaxtı və məkanlar müəyyənləşib.

Yarışa 1/32 final mərhələsindən qatılacaq təmsilçilərimizdən “Azəryol” Bosniya və Hersoqovinanın “ZRK Krivaja” komandası ilə qarşılaşacaq. Qarşılıqlı razılaşma əsasında oyunlar 30 sentyabr – 1 oktyabr tarixlərində rəqib meydanında baş tutacaq.

“Qarabağ” da İspaniyanın “KH-7 BM Granollers” kollektivi ilə üzləşəcək. Hər iki oyun səfərdə olacaq (sentyabrın 30-u və oktyabrın 1-də).

“Kür” isə İtaliyanın “Jomi Salerno” komandası ilə 23-24 sentyabr tarixlərində Mingəçevir “Kür” Olimpiya İdman Mərkəzində üz-üzə gələcək.

İki oyunun nəticəsinə görə üstünlük qazanan komanda növbəti mərhələyə adlayacaq.

Qeyd edək ki, Kişilərdən ibarət “Azəryol” I mərhələnin “Amber” (Litva) – “Brixen” (İtaliya) cütünün qalibinə rəqib olacaq. “Kür” isə Xorvatiyanın “MRK Sesvete” kollektivi ilə mübarizə aparacaq. İlk oyunlar oktyabrın 14-15-də, cavab matçları oktyabrın 21-22-də keçiriləcək.

İNTİQAM Məmmədov