AVARÇƏKMƏ

-----------------------------

Diana Dımçenko AÇ-nın qalibi olub

Fransada təşkil edilən sahil avarçəkməsi üzrə keçirilən və Azərbaycan təmsilçisinin də qatıldığı Avropa çempionatı davam edir. Azərbaycan Kanoe və Avarçəkmə Federasiyasından verilən məlumata görə, bu yarışda ölkəmiz Diana Dımçenko ilə təmsil olunub. Qeyd edək ki, həm Azərbaycan Kanoe və Avarçəkmə Federasiyası, həm də Bakı Avarçəkmə Kanoe İdman klubu (BAKİ) adından çıxış edən Diana yarışda bir nəfərlik qayıqda mübarizə aparıb. O, iki kateqriyada mübarizə aparıb və hər iki kateqoriyada ən yüksək mükafata sahib çıxıb.

Azərbaycan Kanoe və Avarçəkmə Federasiyası adı altında mübarizədə idmançımız təsnifat və yarımfinal mərhələsində finişə birinci çataraq A finalına vəsiqə qazanıb. Diana Dımçenko 6 km məsafəyə həlledici yürüşdə ən yaxın rəqibi irlandiyalı Monika Dukarskanı 16 saniyə geridə qoymaqla (30:14.56 - 30:30.28) Avropa çempionu olub və Fransada Azərbaycan bayrağını qaldırıb.

Maraqlıdır ki, Dımçenko Bakı Avarçəkmə və Kanoe İdman Klubu adından çıxışlarda da fərqlənib. A finalına vəsiqəni təmin edən Diana həlledici final yürüşündə də finişə hamıdan birinci çatmaqla yenə də fəxri kürsünün ən yüksək pilləsinə qalxaraq himnimizi səsləndirib və bayrağımızı qaldırıb.

Qeyd edək ki, Diana Dımçenko ötən il İspaniyanın San Sebastian şəhərində keçirilən sahil avarçəkməsi üzrə Avropa çempionatında qızıl medal qazanmışdı.

İNTİQAM Məmmədov