Avropa çempionu Məhəmməd dünya ikincisidir

Xorvatiyanın paytaxtı Zaqreb şəhərində cüdo üzrə dünya çempionatı (23-27 avqust) keçirilir. 

Yarışlarda Azərbaycan 12 çəki dərəsində 13 oğlan və 5 qız cüdoçu ilə təmsil olunur.

Dünya çempionatının ilk günündə 6 cüdoçumuz tatamiyə çıxıb. 

-50 kq. çəki dərəcəsində yarımfinalda cüdoçularımız Məhəmməd Məmişov gürcüstanlı idmançı Şota Baçoşviliyə, Nihad Məmişov isə qazaxıstanlı idmançı Nurbol Askara qalib gəlib. Cüdoçularımız finalda bir-biriləri ilə qarşılaşıblar.

Beləliklə, Nihad Məmişov dünya çempionatının qızıl, Məhəmməd Məmişov isə gümüş medalına sahib olub.

Məlumat üçün bildirək ki, haqqında bəhs etdiyim Məhəmməd Asif oğlu  Məmişov əslən Masallı rayonunun Təzə Alvadı kəndindəndir. 

17 yaşlı M.Məmişov müxtəlif vaxtlarda Türkiyədə, Gürcüstanda, Rusiyada, ayrı-ayrı ölkələrdə təşkil olunan beynəlxalq yarışlardan Vətənə qızıl və gümüş medallarla dönüb. İspaniyanın Malaqa şəhərində yeniyetmələr arasında keçirilən açıq Avropa turnirində Məhəmməd Məmişov (50 kq) bütün rəqiblərini məğlub edərək fəxri kürsünün ən yüksək pilləsində yer alıb. Fransanın Strasburq şəhərində kadetlər arasında Avropa kuboku yarışında bürünc, may ayında isə Rumıniyanın paytaxtı Buxarest şəhərində yeniyetmələr arasında Avropa kuboku yarışında gümüş medala sahib olub. Xorvatiyanın Poreç şəhərində yeniyetmə idmançılar arasında keçirilən Avropa çempionatında bürünc medal qazanıb. Qitə çempionatında üçüncü yer uğrunda görüşdə ermənistanlı Qor Safaryanı üstələyən Məmişov rəqibini 25 saniyəyə məğlubiyyətə uğradıb.

Portuqaliyanın Odivelas şəhərində cüdo üzrə yeniyetmələr arasında Avropa çempionatının (22-25 iyun, 2023) qızıl medalını qazanıb.

Akif AĞAYEV,                        

Azərbaycan İdman Jurnalistləri Assosiasiyasının üzvü.