VOLEYBOL

---------------------

Qadın voleybol yığmamız Avro-2023-də ikinci qələbəsini qazanıb

Avqustun 15-də Almaniya, Belçika, İtaliya və Estoniyada qadın voleybolçular arasında startı verilən və Azərbaycan yığmasının iştirak etdiyi Avropa çempionatında (Avro-2023) qrup oyunları davam edir. Qeyd edək ki, Almaniya, Türkiyə, Çexiya, Yunanıstan və İsveç millisi ilə birlikdə C qrupunda yer alan Azərbaycan yığması bu gün 4-cü tur çərçivəsində növbəti matçını keçirib. Rəqib Yunanıstan millisi olub. Olduqca gərgin mübarizə şəraitində keçən və dramatiq sonluqla bitən bu görüşdə Azərbaycan komandası Qədim Ellada torpağının təmsilçisi üzərində mühüm qələbə qazanıb -  3:2 (22:25, 25:19, 27:29, 25:18, 15:12). 

Xatırladaq ki, startda Çexiya milisini quru hesabla (3:0) məğlub edən yığmamız ikinci turda ev sahibi Almaniyaya 1:3, 3-cü turda isə Türkiyə komandasına 0:3 hesabla uduzub. Sabah isə yığmamız qrup mərhələsinin son turu çərçivəsində İsveç millisi ilə qarşılaşacaq.  Reqlamentə görə, qrupıarda ilk 4 yeri tutan komandalar növbəti mərhələdə mübarizəni davam etdirmək hüququ qazanacaq. Bu gün yığmamızın yer aldığı qrupda daha bir oyun keçiriləcək. Həmin oyunda ev sahibi olan Almaniya Çexiya ilə üzləşəcək. Yeri gəlmişkən, yığmamızın yer aldığı qrupun oyunları Almaniyanın Düsseldorf şəhərində keçirilir. 

Hazırda C qrupunda vəziyyət belədir:  Тürkiyə (3 oyun) – 9 xal ( setlərin fərqi 9-1), Almaniya (3) – 6 (7-4), Аzərbaycan (4) – 5 (7-8), Yunanıstan (4) – 4 (5-10), Çexiya (3) – 3 (4-6), İsveç (3) – 3 (4-7).

İNTİQAM Məmmədov