CÜDO

---------------------

Rüstəm Orucov cüdoçu karyerasını bitirmək qərarı verib 

Azərbaycanının cüdo üzrə əsas yığmasının üzvü və liderlərindən biri olan, Beynəlxalq cüdo arenasında yüksək nailiyyətləri ilə tanınan Rüstəm Orucov cüdoçu karyerası ilə vidalaşmaqla bağlı qərar qəbul edib. Bu haqda Azərbaycan Cüdo Federasiyasının rəsmi saytı məlumat yayıb. Saysız-hesabsız beynəlxalq turnirlərin qalibi və mükafatçısı olan Rüstəm Orucov gələcək nəsillər üçün hər zaman nümunə olaraq qalacaqdır.

"Bu illər həqiqətən unudulmaz olub və mən xalqımızı mötəbər arenalarda təmsil etməkdən hədsiz qürur duyuram. Bununla belə, hər bir səfər öz sonuna çatır. Bu gün, avqustun 8-də mən Olimpiya medalını qazandım və məhz bu gün mən idmanla vidalaşıram. Bu illər ərzində mənə dəstək olan hər kəsə ürəkdən təşəkkürümü bildirirəm! Nə yaxşı ki, varsınız! İndi isə həyatımda yeni səhifə açmaq və apardığım mübarizə yolunu gənclərə verməyin vaxtıdır.”, - deyə Rüstəm Orucov müsahibəsində bildirib.

Xatırladaq ki, Rüstəm Orucov idman karyerasında çox saylı nailiyyətlərə imza atıb. O, 2016-cı il Rio Yay Olimpiya Oyunlarının gümüş medalçısı olmaqla yanaşı, həmin ildə Avropa çempionu titulunu qazanmışdır. 2017 və 2019-cu illərdə dünya çempionatının gümüş mükafatçısı və Avropa çempionatlarında 1 dəfə gümüş, 3 dəfə isə bürünc mükafata sahib olub. “Masters” turnirində 1 dəfə qızıl medal, 3 dəfə isə bürünc medal qazanıb. Müxtəlif illərdə o, Böyük Dəbilqə və Qran Pri yarışlarında ümumilikdə 26 medal əldə edib.

Qeyd edək ki, sonda Azərbaycan cüdo ailəsi Rüstəm Orucova cüdo idman növünə verdiyi əvəzsiz töhfələrə görə dərin təşəkkür bildirib və ona gələcək fəaliyyətində uğurlar diləyib.

Yeri gəlmişkən, Rüstəm Orucov tatamidə əldə etdiyi uğurlara 73 kq-da imza atıb. Ondan sonra isə bu çəkidə gənc və prespektivli cüdoçu Hidayət Heydərov çıxış edəcək.

İNTİQAM Məmmədov