Tahir Süleymanov: 

Azərbaycan futbolunda nə oliqarx klubları qalmayıb, nə də ki, o rəqabət yoxdur...

Avrokubok həyəcanı davam edir. Paytaxtımızda ilk dəfə olaraq eyni gündə 3 oyun keçiriləcək. Azərkeşlər, jurnalistlər üçün çətinliklər yaranacaq. Komandalarla birgə ən böyük yük təhlükəsizlik tədbirləri ilə bağlı yaşanacaq...

UEFA bayrağı altında, bu sayda qarşılaşmanın eyni anda keçirilməsi Azərbaycan adına məsuliyyət tələb edir. Rəqiblər də sıradan biri deyillər. Müsbət məqam, eyni saatlarda 3 ölkənin diqqəti Bakıda olacaq. Hər zaman olduğu kimi, düşmənlər də öz yerində...

3 "ağ-qara"dan ikisi qarşı-qarşıya gəlir. Şərait, imkanlar fərqli olsa da, heç nədən çəkinilməməlidir. Nə olur olsun, iddialar, mübarizlik meydanda öz əksini tapmalıdır. Vəziyyəti, ümumi durumu hər kəs bilir, yenidən bəhanələrə yer olmamalıdır...

"Neftçi" uzun illərin uğursuzluğundan sonra yeni dönəmə qədəm qoymağı, komandanın dirçəlməsini istəyir. Bunu ən çox arzulayan, haqq edən klubun sadiq azarkeşləridir. Yetərincə problemlər mövcuddur. Komandaya təzyiq olmasın deyə, təhlilləri sonra edərik...

"Neftçi"nin indiki vəziyyəti çox tanışdır. Təəssüf ki, müxtəlif vaxtlarda təsisçi/sponsorların strateji doğru və yanlışlıqları, klubdaxili və ətraf maraqları, komandanın taleyinə öz müsbət/mənfi təsirini göstərir. Hər 3-5 ildən bir yüksəliş/eniş yaşanır. Bu dəfə çox uzun çəkdi proses...

Kluba yeni gələnlərin üzərinə böyük tarixi missiya düşüb.Qarşılaşdığımız mənzərədir. Biz də vaxtilə daha ağır, daha rəqabətli, güclü rəqiblərin çıxış etdiyi çempionatda komandanı qəbul etmişdik. İndiki şəraitdə böyük təminatı olan "Neftçi"ni dirçəltmək daha asandır...

Azərbaycan futbolunda nə oliqarx klubları qalmayıb, nə də ki, o rəqabət yoxdur...

Komandalar başlarını aşağı salıb, dövlət tərəfindən mərkəzləşdirilmiş qaydada maliyyə dayağı ilə bacardıqları futbollarını oynayırlar. Deyilənə görə, yavaş-yavaş AFFA-da təmizlənir, buna cəhdlər edilir...

İstənilən klubun yenilənməsində, formalaşmasında hər ayın, həftənin əvəzolunmaz önəmi var. Peşəkar futbol adına vaxt itkisi yolverilməzdir, 2-3 ay bir mövsümə, strateji anlamda 3-5 ilə bərabərdir.

Düzgün təməl qoyulmasa, qarşısını almaq mümkünsüzdür, klub yüklənir, uğursuzluqlar bir-birini əvəz edir...

2010-cu ilin yayı "Neftçi"nin indiki günlərini xatırladır. Komanda yenidən qurulmalı, məğlub psixologiyaya son qoyulmalı, növbəti 3-5 ilin futbol strategiyası hazırlanmalı idi. Vaxt itirmədən, çempionat bitmədən, yerli futbolçu potensialını dəyərləndirərək, boş mövqelərin doldurulması, yeni mövsüm üçün səfərlərə yollandıq...

Böyük ölçüdə seleksiya işini bitirdikdən sonra, ikinci mərhələyə, Avstriya/Türkiyədə keçirilməsi nəzərdə tutulan təlim-məşq toplanışlarına hazırlıq başladı. Paralel olaraq, seçdiyimiz legionerlərlə müqavilələr bağlanırdı. 5 ilə yaxın çalışdığımız müddətdə, təlim-məşq toplanışları bitəndən sonra bir futbolçu belə "Neftçi"yə transfer olunmayıb!

Hər bir iş zamanında görüləndə effektli olur. Əks halda hazırlıq, adaptasiya dönəmi yarımçıq alınır, heç bir fayda vermir, çempionatda öz təsirini göstərir. Futbol komanda oyunudur, bütün futbolçuların vaxtında düşərgədə olması gələcək uğurlar üçün əsas şərtlərdən biridir!

Avstriya proqramı hazır idi, rumınlarla, polşalılarla yoxlama oyunlarını razılaşdırmışdıq. Komanda hələ tam komplektləşməsə də, daha güclü sparrinq-rəqiblər axtarırdıq. Bu anda təklif gəldi - "Beşiktaş"! Quraejmanın türklərin heyətində ilk matçı olacaqdı...

Türklərlə oyun gün olaraq proqramımıza uyğun gəlmirdi. "Neftçi" adına hazırlığa, yeni mərhələ-zirvə yoluna "Beşiktaş" kimi top-klubla başlamaq psixoloji olaraq böyük önəm daşıyırdı. Komanda hələ tam formalaşmasa da, çəkinmədən, görüşün keçirilməsinə razılıq verdik...

Aviabiletlərin dəyişdirilməsi ilə çətinlik çəkdik.

Oyuna yetişmək üçün səfər heyətini iki yerə böldük. Baş məşqçi/əsas heyət qarşılaşmaya bir gün öncə, özümüz isə növbəti gün Avstriyaya yetişdik. Heyətdə cəmi 2-3 legioner vardı. Flavinyo, Mitreski, Rodriqinyo, Bahadır və digər yenilər gəlmə mərhələsində idilər...

"Beşiktaş"ın heyətində kimlər yox idi? Tam əsas heyət, o vaxtkı prezidentləri Dəmirörən və minlərlə oyuna gələn azarkeşləri. "Neftçi"də isə illərdi uğur qazanmayan 3-4 təcrübəli futbolçular, 1-2 yeni transfer və 18-20 yaşlı gənclərimiz. Futbolçuları psixoloji olaraq gələcəyə inandırdıq...

İlk yarıda 23 yaşlı Ruslan Abışovun Rüştünün qapısından keçirdiyi qolla fasiləyə üstün yollandıq. "Beşiktaş" ancaq matçın sonunda bərabərlik qolunu vura bildi. "Neftçi" hələ tam hazır olmayan heyətlə ilk yoxlama görüşündə komandanın özünəimanının bünövrəsini qoydu.

Böyük klublar üçün hazırlıq, rəsmi oyunlar arasında böyük fərq olmur. Hər oyuna qələbə üçün çıxılır, klubun adı, nüfuzu bunu diqtə edir. Təbii, rəsmi qarşılaşmalarda məsuliyyət daha böyük olmalı, nəticənin təmin olunmasına çalışılmalıdır...

Bu günün "Neftçi"si üçün gözəl şans yaranıb.

Heyətdə kifayət qədər təcrübəli yerli, legioner futbolçu var. Komanda tam komplektləşməsə də, transferlərdə vaxt itirilsə də, futbolçular meydana çıxıb sona kimi mübarizə aparmalı, özünə, qələbəyə, müsbət nəticəyə inanmalı,

inandırılmalıdır...

Məğlub psixologiya, inamsızlıq kənara atılmalı, birdəfəlik unudulmalıdır. İnam - uğurun təməl prinsiplərindən biridir. "Beşiktaş"la oyun, 13 il öncə olduğu kimi, "Neftçi" adına yenidən zirvələrin qət edilməsi yolunda ilk başlanğıc qarşılaşma olmalıdır...

Futbolçu/məşqçi/rəhbər olsun, kimliyindən asılı olmayaraq, köhnəli-yenili, klubda olanlar, təzə gələnlər üçün "Neftçi"nin yenidən dirçəlməsi adına geridönüş anıdır. Populizmdən, gəlişigözəl sözlərdən uzaq durulmalıdır. Fanat/azarkeşlərin qəlblərinin fəth edilməsi - yaşıl meydanlarda qazanılan qələbələrdən keçir...

Uğurlar, "Neftçi"!