CÜDO

------------------

MDB ölkələrinin 2-ci Oyunlarına cüdoçularımız 3 medalla başlayıblar 

Belarusda startı verilən MDB ölkələrinin 2-ci Oyunları davam edir. Bu gün oyunlar çərçivəsində cüdo yarışı başlayıb və ilk günd 3 cüdoçumuz tatamiyə çıxıb. Maraqlıdır ki, hər üç təmsilçimiz uğurla çıxış edərək mükafatçılar sırasında yer alıblar. İkisi hətta Belarusda Azərbaycanın himnini də səsləndirib. Söhbət bütün görüşlərini qələbə ilə bitirən və qızıl medala layiq görülən Nihad Məmişovla (50 kq) Ayxan Mirzəzadədən (55 kq) gedir. Bu gün tatamiyə çıxan digər təmsilçimiz - Xədicə Abdullayeva (40 kq) isə oyunlarda 3-cü yeri tutmaqla bürünc medal qazanıb. 

Qeyd edək ki, Belarusda MDB ölkələrinin Oyunlarının cüdo yarışları avqustun 5-dən 7-nə qədər keçiriləcək. Azərbaycan bu yarışda 16 çəki dərəsində 15 oğlan və 12 qız cüdoçu ilə təmsil olunacaq.

Cüdoçularımız sözügedən Oyunlara yeniyetmələrdən ibarət komandanın məşqçiləri Nicat Şıxəlizadə və Emin İskəndərov və qadınlardan ibarət yığmanın məşqçisi Kifayət Qasımova rəhbərliyi altıbda qatılıb.

5-6 avqustda cüdoçuların fərdi, 7 avqustda isə komanda yarışları keçiriləcək. Cüdo yorışları Belarusun Qomel şəhərində yerləşən Qomel Buz İdman Sarayında keçirilir.

İNTİQAM Məmmədov