VOLEYBOL

-----------------------

Mariya Kirilyuk: "İnanıram ki, çempionatda uğurlu çıxış edəcək və qarşımızda qoyulan məqsədlərə çatacağıq"

Qadın voleybolçulardan ibarət yığma komandamız qarşıdakı Avropa çempionatına hazırlıq prosesini Bakıda davam etdirir. Bu arada yığmanın blokçusu Mariya Kirilyuk Azərbaycan Voleybol Federasiyasının rəsmi saytına verdiyi açıqlamasında Avropa çempionatına hazırlıq prosesindən və qarşıya qoyulan məqsədlərdən danışıb: "Hazırda Avropa çempionatına hazırlığımız yüksək səviyyədə davam edir. Komandamızın baş məşqçisinin (türkiyəli mütəxəssis Ataman Gileyligil) müəyyən etdiyi taktikalar üzərində çalışır və tapşırıqlarını ciddi səylə yerinə yetiririk. Komandamızda yüksək əhval-ruhiyyə var. Çox şükür mənim də səhhətimdə heç bir problem yoxdur. Məşqlərə başladığımız gündən öz formamı yığmağa çalışdım və deyə bilərəm ki, yarışa tam hazıram.

Bir neçə gündür ki, Bosniya və Herseqovinadakı təlim-məşq toplanışını başa vurub Bakıya qayıtmışıq.

Qarşıda Belarusla yoxlama oyunlarımız olacaq. Yoxlama oyunları zamanı çatışmazlıqları daha aydın görəcək və onları aradan qaldırmağa çalışacağıq.

Avropa çempionatına çox az vaxt qalıb. İnanıram ki, çempionatda uğurlu çıxış edəcək və qarşımızda qoyulan məqsədlərə çatacağıq".

Qeyd: Avro-2023 avqustun 15-dən sentyabrın 2-dək Belçika, Almaniya, İtaliya və Estoniyada keçiriləcək. Yığmamız Çexiya (18 avqust), Almaniya (19 avqust), Türkiyə (20 avqust), Yunanıstan (22 avqust) və İsveçlə (23 avqust) birlikdə C qrupunda yer alıb. Azərbaycan yer aldığı qrupun bütün oyunları Almaniyanın Düsseldorf şəhərində keçirəcək. 

İNTİQAM Məmmədov