ŞAHMAT

-------------------------

Mübarizəni tay-brekdə davam etdirən şahmatçılarımız da DK-nun növbəti mərhələsinə keçib 

İki gün öncə paytaxt Bakıda 309 (206 kişi və 103 qadın) şahmatçının iştirakı ilə startı verilən və mükafat fondu 2,5 milyon avro təşkil edən Dünya Kubokunun ilk mərhələ yarışı (kişilərdə 1\128, qadınlarda 1\64 final) bu gün keçirilən bir neçə tay-brek görüşləri ilə başa çatıb. Qeyd edək ki, tay-brekdə beş təmsilçimiz -  Eltac Səfərli, Vüqar Əsədli, Maqomed Muradlı, Misrətdin İsgəndərov və Aydın Süleymanlı mübarizəni davam etdirib. Beşliyimizin hamısı tay-breki qələbə ilə bitirərək mərhələni adlamağa nail olub. Tay-brekdə ən çox diqqəti çəkən isə Aydın Süleymanlınin Çin təmsilçisi Yunqlyun Syu ilə qarşılaşması olub. Gərgin mübarizə şəraitində keçən bu görüş sonda Süleymanlının qələbəsi ilə bitib -  4:3 (partiyalar üzrə nəticələr  - 0,5:0,5,  0,5:0,5,  0,5:0,5,  0,5:0,5,  0,5:0,5,  0,5:0,5,  1:0). Həmyerlilərimizin iştirakı ilə keçirilən 4 qarşlaşma 2 partiyadan sonra basa çatdığı halda, burada qalib yalnız 7-ci oyundan sonra bəlli olub. 

Sabah Dünya Kubokunda növbəti mərhələnin (kişilərdə 1/64, qadınlarda isə 1/32 final) ilk oyunları keçiriləcək. İkinci mərhələdə Azərbaycan şahmatının liderləri - Şəhriyar Məmmədyarov, Teymur Rəcəbov və Günay Məmmədzadə də mübarizəyə qatılacaq. 

İNTİQAM Məmmədov