OLİMPİZM

----------------------

Azərbaycan 3-cü Avropa Oyunlarında 11 medalla 24-cü yeri tutub

İyunun 20-dən iyulun 2-dək Polşanın Krakov şəhərində 3-cü Avropa Oyunları keçirilib. 12 gün davam edən bu möhtəşəm turnirdə Azərbaycan idmanın 14 növündə 101 idmançı ilə təmsil olunub. İdmançılarımız Oyunlarda 3-ü qızıl, 2-si gümüş və 6-sı bürünc əyarlı olmaqla 11 medal qazanıb. Bu isə Azərbaycana medal sıralanmasında 41 ölkə arasında 24-cü olmaq imkanı verib. Oyunlarda birinci yeri İtaliya (35-26-39), ikinci yeri İspaniya (21-17-19), üçüncü yerisə Ukrayna (21-12-8) tutub. 

Azərbaycan yığmasının aktivinə yazılan medallara gəlincə, qızılları bütün görüşlərini qələbə ilə bitirən Tural Ağalarzadə (68 kq), İrina Zaretska (68 kq. hər ikisi karate) və kikboksçu Fərid Ağamoğlanov (63,5 kq, ful-kontakt) qazanıb. Gümüşlər yalnız həlledici finalda büdrəyən Səyad Dadaşovla (54 kq, taekvondo) Məhəmməd Abdullayevin (+92 kq. boks) payına düşüb. Bürünc medalları isə Asiman Qurbanlı (+84 kq, karate), Həşim Maqomedov (68 kq, taekvondo), Aysu Dəvrişova (57 kq), Emili Rzayeva (63,5 kq), Xəyal Əliyev (67 kq. hər üçü muay-tay ustası) və Murad Allahverdiyev (80 kq, boks) qazanıb. 

Xatırladaq ki, 2015-ci ildə Bakıda təşkil edilən 1-ci Avropa Oyunlarında Azərbaycan 1-ci. 2019-cu ildə Minskdə (Belarus) keçirilən 2-ci Oyunlarda Azərbaycan ilk onluğu tamamlamışdı. 

İNTİQAM Məmmədov