FUTBOL

-------------------

Kərim Benzema  sıradan çıxıb

İspaniya La Liqasının 36-cı turu Madrid "Real"ı üçün həm yaxşı, həm də pis sonluqla yadda qalıb. Belə ki, həmin turda "Rayo Valekano" üzərində 2:1 hesablı qələbə qazanan "Kral klubu" həm də ciddi itki ilə üzləşib. Söhbət "Real"ın fransalı forvardı Kərim Benzemanın zədələnərək sıradan çıxmasından gedir. İspaniyada nəşr olunan "Marka"nın yazdığına görə, Benzema həmin matçın 10-cu dəqiqəsindən axsamağa başlayıb və ağrılardan şikayətlənib. Lakin buna baxmayaraq, 31-ci dəqiqədə hesabı açan Benzema matçın sonuna qədər meydanda qalıb. Oyundan sonra isə onun sağ ayağına 5 tikiş qoyublar. Nəticədə o, La Liqanın 37-ci turu çərçivəsində "Sevilya"ya qarşı matçın bu günkü hazırlıq prosesində (məşqdə) itirak etməyib. Onun həmin oyunda iştirakı da sual altındadır. Amma bütün bunlara baxmayaraq, Benzema 37-ci turda meydana mıxmaqda israrlıdır. Çünki, La Liqada 23 oyunda 18 qol vuran fransalı forvard "Barselona"nın polşalı forvardı, hazırda La Liqanın ən yaxşı bombardiri olan Roberto Levandovskidən 5 qol az vurub. Benzema isə mövsümün sonuna qədər onu qabaqlamaq istəyir. 

İNTİQAM Məmmədov