AĞIR ATLETİKA

---------------------------

Azərbaycanlı atlet Ömər Cavadov Afrika çempionatında 4-cü yeri tutub

O, yalnız bir kiçik gümüşlə kifayətlənib

Mayın 11-də Tunisin paytaxtı Tunis şəhərində kişi və qadınlar arasında start götürən ağır atletika üzrə 33-cü Afrika çempionatı davam edir. Qey edək ki, mayın 18-dək davam edəcək bu çempionatda Azərbaycan yığma komandasının üzvləri də iştirak ediblər. Dünən daha bir atletimiz "Qara Qitə" çempionatında körpücük üzərinə çıxaraq, nəyə qadir olduğunu nümayiş etdirib. Söhbət 73 kq çəki dərəcəsində çıxış edən Ömər Cavadovdan gedir. Təəssüflər olsun ki, Cavadov özündən əvvəl çıxış edən komanda yoldaşlarının uğurunu təkraralya bilməyib.

Birdən qaldırma hərəkətində 143, təkanla qaldırmada isə 167 kq çəkini ram edən Ömər iki hərəkətin cəmində 310 kq (143+167) nəticə göstərib. Bu nəticə isə ona yalnız 4-cü yeri tutmaq imkanı verib. Ömərin təskinliyi birdən qaldırmada ikinci olaraq kiçik gümüş medal qazanması olub.

Xatırladaq ki, Cavadovdan öncə körpücük üzərinə çıxan təmsilçilərimiz - Nazilə İsmayılova (45 kq) və İsa Rüstəmov (67 kq) hərəyə 3 qızıl medal qazanmaqla Afrika çempionu olub. Bir məqamı da qeyd edək ki, Afrika çempionatı da 2024-cü ildə Parisdə (Fransa) keçiriləcək Olimpiada-2024-ə lisenyia xalları verib.

Qeyd: Azərbaycan yığması aprelin sonunda İrəvanda keçirilən Avropa çempionatında üzləşdiyi məlum səbəb görə, Beynəlxalq Ağır Atletika Federasiyası atletlərimizə Afrika çempionatında iştirak etmək imkanı verib.

İNTİQAM Məmmədov