FORMULA-1. FİNAL 

----------------

Azərbaycan Qran-Prisinin finalı 15:00-da başlayacaq

Finalın start sıralanmasında Şarl Lekler birincidir

Bu gün həlledici final yürüşü ilə formula-1 üzrə dünya çempionatının sayca 4-cü Azərbaycan Qran-Prisinə yekunvurulacaq. Bakı vaxtı ilə saat 15:00-da başlanacaq final (əsas) yürüşün start sıralanmasında "Ferrari"nin pilotu Şarl Lekler birincidir. Qeyd edək ki, sıralanmada ikinci yeri geridə qalan 3 Qran-Pridən ikisinin qalibi və hazırda pilotların yarış cədvəlinə liderlik edən Maks Ferstappen ("Red Bull") tutur. İlk üclükdə onun komanda yoldaşı, Azərbaycan Qran-Prisində sprinq yürüşünün qalibi və eləcə də cari mövsümdə bir Qran-Prini udan Serxio Peres yer alıb.  Karlos Saynsın ("Ferrari") 4-cü olduğu sıralanmada 7 qat dünya çempionu adını daşıyan britaniyalı pilot Lyuis Hemlton ("Mersedes") 5-ci pillədə qərarlaşıb. 

Fernando Alonso ("Aston Villa"), Lando Noris ("Maklaren"), Yuki Tsunoda ("Alfa Tauri"), Lans Stroll ("Aston Martin"), Oskar Piastri ("Maklaren"), Corc Rassell ("Mersedes"), Aleks Albon ("Vilyams"), Valtteri Bottas  ("Alfa Romeo"), Loqan Sarcent ("Vilyams"), Çjou Quanyuy ("Alfa Romeo"), Kevin Maqnussen ("Xaas"), Pyer Qasli ("Alpin") və Nik dü Vris ("Alfa Tauri") isə müvafiq ardıcıllıqla 6-18-ci sırada yer alıb. Esteben Okon ("Alpin") və Niko Xyulkenber ("Xaas") isə son sıralarda mübarizəyə qatılacaq. 

İNTİQAM Məmmədov