Rafiq Hüseynovsa yarımfinalı adlaya bilməyib

Xorvatiyanın paytaxtı Zaqrebdə güləş üzrə keçirilən Avropa çemionatı başa çatmaq üzrədir. Bu gün daha 5 çəki dərəcəsində yarımfinal görüşləri keçirilib və bununla da finalşılar bəlli olub. Qeyd edək ki, yarımfinalda 3 güləşçimiz mübarizə aparıb. Onlardan ikisi - Həsrət Cəfərov (67 kq) və Ülvi Qənizadə (72 kq)  bu mərhələni də uğurla keçərək finala qalxaraq çempionluq uğrunda güləşmək imkanı qazanıb. Təəssüflər olsun ki, daha bir yarımfinalçımız - ikiqat Avropa çempionu adını daşıyan Rafiq Hüseynov (82 kq) yarımfinalı adlaya bilməyib.Qeyd edək ki, 1\4 finalda erməni Samvel Qriqoryanı məğlub edən Hüseynov burada türkiyəli Burxan Ağbudaka uduzub - 1:5.

Bununla da o, sabah digər təmsilçilərimiz Nihat Məmmədli (60 kq) kimi bürünc medal uğrunda mübarizə aparacaq. 

Bu axsam saatlarında isə 3 təmsilçimizin iştirakı ilə final görüşləri keçiriləcək. Həmin final görüşlərində Əzizli Adem Uzunla (Türkiyə), Məmmədov Leri Abduladze (Gürcüstan), Şəriəti isə Riza Kayalpla (Türkiyə) güləşəcək. Son iki ildə öz çəkisinin qalibi olan Eldəniz Əzizli titulunu qorya bilsə 3 qat avropa çempionu olacaq. Daha bir təmsilçimiz İslam Abbasovsa (87 kq) gürcüstanlı Laşe Qobadzeylə üçüncü yer uğrunda üzləşəcək. 

Xatırladaq ki, AÇ-nın ilk 5 günündə Azərbaycan yığması 3-ü qızıl, 3-ü gümüş və 2-si bürünc əyarlı olmaqla 8 medal qazanıb. Bu medallardan bir qızıl və bir gümüş qadınların payına düşüb. Qadın yığmamızın lideri Mariya Stadnik (50 kq) 10-cu dəfə Avropa çempionu olub. Gümüş medalı isə həlledici görüşdə ukrayna təmsilçisinəı  uduzan Jalə Əliyeva (57 kq) qazanıb. Sərbəst güləşçilərə gəlincə, Əliabbas Rzazadə (57 kq), Hacı Əliyev (70 kq, 4-cü dəfə) qızıl, Osman Nurmaqomedovla (92 kq) Maqomedxan Maqomedov (97 kq) gümüş, Abubakr Abakarovla (86 kq) Qeorqi Meşvildişvili (125 kq) isə bürünc medala sahib çıxıb.

İNTİQAM Məmmədov