Çernoqoriyanın Petrovatse şəhərində qadınlar arasında şahmat üzrə keçirilən və Azərbaycanın şahmatçılarının da iştirak etdiyi şəxsi Avropa çempionatı davam edir. Dunya Kubokuna seçmə xarakteri daşıyan və 14 təmsilçimizin mübarizə apardığı bu turnirdə 4 tur artıq geridə qalıb. 4 turdan sonra təmsilçilərimiz arasında ən yaxşı nəticə Gövhər Beydullayevaya məxsusdur. 4 mümkün xaldan 3,5 xal toplayan və 136 iştirakçı arasında reytinq göstəricisinə görə 21-ci olan Beydullayeva hazırda yarış cədvəlində ilk üçlüyü tamamlayır. Digər şahmatçılarımıza gəlincə, hərəyə 2,5 xal toplayan Gülnar Məmmədova, Günay Məmmədzadə və Ülviyyə Fətəliyeva müvafiq olaraq, 33-35-ci yerləri bölüşür. Eyni xala malik olan Xanım Balacayeva isə əlavə ımsallara görə 40-cı pillədə yer alıb. 

Bu gün çempionatda 5-ci turun partiyaları keçiriləcək. Hesabat turunda bizlər üçün ən maraqlı görüş Gövhər Beydullayeva ilə eyni xal toplamasına rəğmən 7-ci pillədə yer alan erməni Emilya Danielyan arasında olacaq. 

Qeyd edək ki, isveçrə sistemi üzrə keçirilməklə 11 turdan ibarət olan bu çempionatda ilk 9 yeri tutan şahmatçı iyulun sonunda Bakıda start götürəcək Dünya Kubokuna vəsiqə qazanmış olacaq. 

İNTİQAM Məmmədov