Bu gün Belçikanın Lommel şəhərində taekvondo üzrə həmin ölkənin açıq çempionatına start verilib. İki gün keçirilməsi nəzərdə tutulan bu G2 kateqoriyalı yarışda Azərbaycan millisi həm qadınların, həm də kişilərin yarışında təmsil olunur.

Azərbaycan Taekvondo Federasiyasından verilən məlumata görə, baş məşqçi Reza Mehmandost və böyük məşqçi Elnur Amanovun rəhbərlik etdiyi kişilərdən ibarət komandanın heyətində Səyyad Dadaşov, Rahid Vəliyev (hər ikisi 54 kq), Qaşım Maqomedov (58 kq), Xanoğlan Kərimov, Pərviz İskəndərov (hər ikisi 63 kq), Cavad Ağayev, Yaşar Məmmədli (hər ikisi 68 kq), Eltac Qafarov (74 kq), Əliəskər Əliyev (80 kq), Taleh Süleymanov (87 kq) və Həmidreza Bədriəliabadi (+87 kq) yer alıb.

Qadınlardan ibarət yığmanın baş məşqçisi Sin Mi Park və böyük məşqçi Hyeyounq Çoin isə Belçikada 6 idmançını yoxlamaq qərarına gəlib. Bu altılığa isə Məryəm Məmmədova, Minayə Əkbərova, Zemfira Həsənzadə (hər üçü 46 kq), Patimat Abakarova, Səmərrux Osmanova (hər ikisi 53 kq) və Fatimə Məcidova (62 kq) cəlb edilib.

Çempionatda ATF-in baş hakimi, beynəlxalq dərəcəli referi Gündüz Abdullayev və beynəlxalq dərəcəli hakim Aygül Abdullayeva isə ədalət təmsilçiləri sırasında yer alacaq.

Komandamız martın 20-də Bakıya qayıdacaq.

İNTİQAM Məmmədov