Günay Məmmədzadə və Ülviyyə Fətəliyeva ötənilki uğurlarını təkrarlaya biləcəkmi?

Bu gün Çernoqoriyanın Petrovatse şəhərində Azərbaycan təmsilçiləri də daxil olmaqla, qadın şahmatçıların şəxsi Avropa çempionatına start verilib. Martın 29-dək davam etməklə Dünya Kubokuna seçmə xarakteri daşıyan bu çempionatda Azərbaycan 14 şahmatçı ilə təmsil olunur. Bu ondürdlükdə isə ötənilki çempionatın ikincisi Günay Məmmədzadə, eləcə də həmin çempionatın bürünc mükafatçısı olan Ülviyyə Fətəliyeva ilə yanaşı, Gövhər Beydullayeva, Xanım Balacayeva. Gülnar Məmmədova, Xəyalə Abdulla, Mələk İsmayıl,  Türkan Məmmədyarobva, Səbinə İbrahimova. Ayan Allahverdiyeva, Ləman Hacıyeva. Nərmin Abdinova, Nazlı Hümbətova və Lalə Hüseynova  yer alıb. Adıçəkilən şahmatçılarımız həm çempionatın medalları, həm də Dünya Kubokuna vəsiqə qazanmaq üçün bütün bacarıqlarını ortaya qoyacaqlar. Qeyd edək ki, İsveçrə sistemi üzrə keçirilməklə 11 turdan ibarət olan bu çempionatda ümumilikdə, 33 ölkədən 121 zəka sahibinin iştirak edir ki, onlardan da yalnız ilk 9 yeri tutan şahmatçı bu ilin yayında Bakının ev sahibliyi edəcəyi Dünya Kubokuna vəsiqə qazanacaq. 

Xatırladaq ki, ötən il keçirilən analoji çempionatda Azərbaycan şahmatçılarından üçü - Gülnar Məmmədova (AÇ-2022-də 4-cü yer), Günay Məmmədzadə (AÇ-2022-də ikinci yer) və Ülviyyə Fətəliyeva (AÇ-2022-də üçüncü yer) Dünya Kubokuna vəsiqə qazanıb. Çempionata martın 29-da yekun vurulacaq. 

İNTİQAM Məmmədov