Dünən Rumıniyanın paytaxtı Buxarest şəhərində güləş üzrə U-23 Avropa çempionatı start götürüb. Yunan-Roma güləşçilərinin çıxışı ilə startı verilən çempionatın ilk günü 55, 63, 77, 87 və 130 kq-da çıxış edən yunan-Roma güləşçiləri mübarizə aparıb.

Azərbaycan Güləş Federasiyasından verilən məlumata görə, ilk yarış günü döşək üzərinə çıxan güləşçilərimizdən yalnız Xasay Həsənli (77 kq) uğurla mübarizə aparıb. Ötən il analoji yarışın qalibi olan pəhləvanımız burada əvvəlcə türkiyəli Şahan Acara (10:0), daha sonra isə litvalı Aistis Liauqminasa (9:0) tam üstünlüklə qalib gəlib. Yarımfinalda ukraynalı Nikita Politayevdən (5:1) güclü olan Həsənli finala yüksəlib. O, bu gün finalda moldovalı Aleksandrin Qutu ilə üz-üzə gələcək.

Təəssüflər olsun ki, start günü mübarizəyə qatılan digər təmsilçilərimiz heç nə ilə yadda qalmayıblar. 1\4 finala yüksələn Rahim Həsənov bu mərhələdə ermənistanlı Karapet Manvelyana (1:7), Ziya Babaşov (63 kq) ilk mərhələdə bu ölkənin digər təmsilçisi Sahak Hovannisyana (1:3), Məhəmməd Əhmədiyev (87 kq) təsnifat mərhələsində gürcüstanlı Açiko Bolkvadzeyə (4:5), Sərxan Məmmədov (130 kq) isə startda ukraynalı Mixaylo Vişnivetskiyə (1:9) məğlub olub. Sərxanın rəqibi finala yüksəldiyi üçün güləşçimiz sabah təsəlliverici görüşdə rumıniyalı Gean Ali ilə qarşılaşacaq.

Bu günsə daha 5 təmsilçimiz mübarizəyə qatılıb. Onlardan isə üçü - Elmir Əliyev (60 kq), Qurban Qurbanov (72 kq) və Murad Əhmədov (97 kq) uğurla çıxış edərək finala yüksəlib. Bu triomuz isə final görüşünü sabah keçirəcək. 

İNTİQAM Məmmədov