Xorvatiyanın paytaxtı Zaqreb şəhərində keçirilən cüdo üzrə yeniyetmələr arasında Avropa Kuboku turnirinin ilk günü Azərbaycan cüdoçuları üçün uğurlu olub. Azərbaycan Cüdo Federasiyasından verilən məlumata görə, çüdoçularımız yarışın start günü 1-i qızıl və 4-ü bürünc olmaqla 5 medal əldə edib.

Turnirin ilk günündə qızların yarışında -40 kq., -44 kq., -48 kq. və 52 kq. çəki dərəcələrində 14 cüdoçumuz, oğlanların yarışında isə -50 kq., -55 kq., -60 kq. və -66 kq. çəki dərəcələrində 17 cüdoçumuz medallar uğrunda mübarizə aparıb.

-50 kq. çəkidə Əhməd Rüstəmov bürünc medal uğrunda görüşdə gürcüstanlı idmançı Luka Omanadzeyə qalib gələrək yarışı 3-cü yerdə başa vurub.

-55 kq. çəkidə Həsən Həsənli və Fərid Qarayev də turnirin bürünc medalını qazanıb. Eyni çəki dərəcəsində mübarizə aparan Mirxaliq İskəndərov isə daha yaxşı nəticə göstərib. O, finalda Qazaxıstan təmsilçisi Oralbek Bayzaka qalib gələrək qızıl medal qazanıb.

-60 kq. çəkidə Ümüd Qurbanov bürünc medal uğrunda görüşdə serbiyalı cüdoçu Velko Simiki üstələyib.

Qızların mübarizəsində -48 kq. çəkidə Vüsalə Hacıyeva 5-ci, -40 kq. çəkidə Gülşən Hüseynova 7-ci yerlə kifayətlənib. Oğlanlar arasında -55 kq. çəkidə isə Ayxan Mirzəzadə 5-ci yerə çıxıb. Davam edən turnirin ikinci günündə qızların yarışında -57 kq., -63 kq. və -70 kq. çəki dərəcələrində 3 cüdoçumuz, oğlanların yarışında isə -73 kq., -81 kq., -90 kq. və +90 kq. çəki dərəcələrində 16 cüdoçumuz medallar uğrunda mübarizə aparacaq.

İNTİQAM Məmmədov