Orxan Səfərovsa 5 pillə qalxmaqla 7-ci olub

Ötən həftəsonu Təl-Əvivda (İzrail) kişi və qadın cüdoçular arasında keçirilən "Böyük Dəbilqə" turnirindən sonra Beynəlxalq Cüdo Federasiyası (İJF) tatami ustalarının yeni reytinq cədvəlini elan edib. Həmin turnirin nəticəsindən asılı olaraq, bəzi cüdoçularımız mövqelərini bir qədər də yaxşılaşdırıblar. 60 kq-da mübarizə aparan və bürünc medalın bir addımlığında dayanan Balabəy Ağayev yeni cədvəldə bir pillə irəliləməklə öz çəkisində 2-ci olub. Onunla eyni çəkidə güləşən cüdoçular - Kəramət Hüseynovla Turan Bayramova gəlincə, birinci 3 pillə geriləməklə 14-cü olduğu halda, ikinci 17-ci pillədə qalıb. 

66 kq- çəkidə mübarizə aparan və Təl-Əvivdə gümüş medal qazanan Orxan Səfərov 5 pillə irəliləməklə 7-ci yerə qalxıb. Həmin çəkidə Yaşar Nəcəfovsa 18-dən 20-ci yerə düşüb. 

73 kq-da güləşən Hidayət Heydərov 2-dən 3-ə, Rüstəm Orucovsa 19-dan 23-cü yerə yuvarlanıb. 81 kq-da Səid Mollai yenə də 3-cüdür. İki pillə geriləyən Elcan Hacıyev 20-ci, Zəlim Tskayevsə 21-cidir. 

90 kq çəkidə tatamiyə çıxan Məmmədəli Mehtiyev 1 pillə aşağı düşməklə 8-ci, həmin çəkidə Murad Fətiyevsə 40-cıdır. 

Təl-Əvivdə uğurla çıxış edərək birinci yeri tutan cüdoçumuz Zəlim Kotsayev (100 kq) yenə də 3-cü yerdə qalıb. Onunla eyni çəkidə güləşən Elmar Qasımovsa 6 pillə geriləyərək 25-ci yerə düşüb. 

+100 kq-da Uşanqi Kokuari mövqeyini yaxşılaşdırıb. İzraildə gümüş medal qazanan Uşanqi 15-ci pillədən 10-cu yerə qalxıb. Həmin çəkidə Camal Qəmzatxanovsa yenə də 40-cıdır. 

Zəriflərimizin mövqeyinə gəlincə, burada ürəkaçan heçnə yoxdur. Hətta qadın yığmamızın lideri İrina Kindzerskaya (+78 kq) 40-cı yerdədir. Lyela Əliyeva (48 kq) isə daha iki pillə geriləməklə 38-ci yerə düşüb. Bunlardan başqa Top-50-də yer alan qadın cüdoçumuz yoxdur. 

 İNTİQAM Məmmədov