Balabəy Ağayevsə bürünc uğrunda güləşəcək

Bu gün İsrailin paytaxtı Təl-Əvivdə kişi və qadın cüdoçular arasında "Böyük Dəbilqə" turnirinə start verilib. Saya mövsümün ikinci belə turniri olan və 9 Azərbaycan cüdoçusunun da qatıldığı turnirin ilk günü tatami üzərinə 3 təmsilçimiz çıxıb ki, onlardan da biri - Orxan Səfərov (66 kq) finala qədər irəliləyərək ən azından gümüş medalı özünə təmin edib. Qeyd edək ki, müvafiq ardıcıllıqla Xoakin Tovaqliarini (Argentina), David Qarsiey Torneni (İspaniya), Denislav İvanovy (bolqarıstan) və Laşu Nadiradzeni (Gürcüstan) üstələyən Səfərov həlledici finalda digər gürcü idmançı - Vajey Marqelaşvili ilə üzləşəcək.

Daha biri - analoji turnirin üçqat qalibi adını daşıyan Balabəy Ağayevsə (60 kq) yarımfinalda büdrəməklə bürünc medal uğrunda mübarizə aparmaq imkanı qazanıb. Xatırladaq ki, Brayana Qarboanı (Ekvador) və Simon Aversı (İtaliya) məğlub etdikdən sonra yarımfinalda fransalı Luke Mxeidzeyə uduzan Ağayev bürünc uğrunda türkiyəli Salih Yıldızla qarşılaşacaq. Təəssüflər olsun ki, Ağayevlə eyni çəkidə çıxış edən Turan Bayramovsa 1\16 finalda qalib gəlsə də, 1\8 finalda türkiyli Yıldıza uduzub. 

Sabah isə çəkisi 73 və 81 kq olan tatami ustaları mübarizəyə qatılacaqlar. Bu çəkilərdə ölkəmizi müvafiq olaraq, Rüstəm Orucovla Məmmədəli Mehdiyev təmsil edəcək. 

İNTİQAM Məmmədov