Masallıda rayon icra hakmiyyətinin təşəbbüsü, gənclər və idman idarəsinin təşkilatçılığı ilə 2 fevral - Azərbaycan Gəncləri Gününə həsr olunmuş tədbir keçirilib.

“Heydər Əliyev və Azərbaycan gəncliyi” mövzusunda təşkil olunan ümumrayon tədbirinin iştirakçıları əvvəlcə Ümummilli Lider Heydər Əliyevin abidəsinin önünə gül dəstələri düzüb, Ulu Öndərin xatirəsini ehtiramla yad ediblər.

Masallı Mədəniyyət Mərkəzində təşkil olunan tədbirdə rayon icra hakimiyyətinin başçısı Araz Əhmədov və rayon rəsmiləri, millət vəkili Məşhur Məmmədov, rayonun ictimai-siyasi, mədəni həyatında fəallığı ilə seçilən gənclər, ictimaiyyət və media nümayəndələri iştirak ediblər.

Mərkəzin foyesində gənclərin idman tədbirlərindəki uğurlarını əks etdirən guşə, eləcə də istedadlı gənclərin rəsm və əl işləri sərgisi ilə tanışlıq olub. 

Tədbir öncəsi Ulu öndər Heydər Əliyevin və ölkəmizin ərazi bütövlüyü uğrunda canlarını qurban vermiş şəhidlərimizin xatirəsi bir dəqiqəlik sükutla yad edilib. 

Tədbiri giriş sözü ilə açan aparıcı İradə İmanbəyli ölkəmizdə gənclər siyasətinin əsasının Ulu öndər Heydər Əliyev tərəfindən qoyulduğunu, bu gün respublika Prezidenti cənab İlham Əliyevin bu siyasətə sadiqliyini öz qərarları ilə təsdiq etdiyini vurğulayaraq gənclərimizin ən sevimli günlərindən biri olan 2 fevral Azərbaycan Gəncləri Günü münasibətilə bütün gəncləri təbrik edib.

Sonra 2 fevral – Azərbaycan Gəncləri Gününə həsr edilmiş “Heydər Əliyev və Azərbaycan gəncliyi” adlı videoçarx nümayiş olunub.

Ümummilli lider Heydər Əliyevin aydın strategiyası ilə müstəqilliyimizin ilk illərində gənclərimizin enerji və imkanlarının milli maraqlarımızın müdafiəsinə səfərbər edildiyini vurğulayan Masallı Rayon İcra Hakimiyyətinin başçısı Araz Əhmədov çıxışında bildirib ki, 1996-cı il fevralın 2-də keçirilən Azərbaycan Gənclərinin Birinci Forumunda Ümummilli Lider gənclər qarşısında mühüm tarixi vəzifələr müəyyənləşdirdi: “2003-cü ildən sonrakı dövrdə isə Prezident cənab İlham Əliyev gənclər siyasətinin inkişaf istiqamətini mövcud ənənələr əsasında daha da təkmilləşdirdi, bu sahə üzrə Dövlət proqramları qəbul edildi. Gənclər siyasətində milli və dövlətçilik maraqlarının prioritet olması 44 günlük Vətən müharibəsində həlledici rol oynadı. Müharibədə əsas missiyanı məhz Ali Baş Komandan İlham Əliyevin prezidentliyi dövründə yetişən gənclər yerinə yetirdilər. Bu haqq savaşında böyük vətən sevgisi nümayiş etdirən Azərbaycan gəncliyi sırasında Masallılı gənclərimiz də istər döyüş meydanında, istərsə də arxa cəbhədə, o cümlədən informasiya müharibəsində fəallıq göstərdilər...”

RİH başçısı eyni zamanda rayonumuzda sosial-iqtisadi, ictimai-siyasi və digər sahələrdə çalışan gənclərin nailiyyətlərinin qürurverici olduğunu, Ölkə başçısının gənclərin sahibkarlıq, məşğulluq imkanlarının artırılması, sahibkarlıq bacarıqlarının inkişaf etdirilməsinin respublikanın hər yerində olduğu kimi Masallıdadan da yan keçmədiyini və bu istiqamətdə möhtərəm Prezidentimiz İlham Əliyevin təsdiq etdiyi Dövlət Proqramının rayondakı icrası yönümündə çox işlər görüldüyünü bildirib.

Ötən ildə idman sahəsi üzrə həyata keçirilən  tədbirlər və əldə edilən uğurlar barədə məlumat verən Masallı Rayon Gənclər və İdman İdarəsinin rəisi Sabiq Cahangirov qeyd edib ki, yeniyetmə və gənclərin hərbi vərdişlərə yiyələnməsi, fiziki inkişafının dəstəklənməsi, qabiliyətlərini inkişaf etdirə bilmələri üçün mütəmadi olaraq gənclər arasında vətənpərvərlik, dövlətçilik, milli-mənəvi və ümumbəşəri dəyərlərə hörmət hisslərinin yüksək səviyyədə aşılanması məqsədi ilə kifayət qədər tədbirlər keçirilməsi üçün bütün şərait yaradılıb, vaxtaşırı olaraq müxtəlif idman növləri üzrə yarışlar keçirilib.

İdarə rəisi bildirib ki, 2022-ci il ərzində respublika birincilikləri yanaşı beynəlxalq yarışlarda uğurlara imza atan idmançılardan  Ruzanna Məmmədova İtaliyada keçirilən sərbəst güləş üzrə dünya çempionatında, Rumıniyadakı Avropa çempionatında dərəcəsində qızıl, Əməkdar idman ustası Vəli İsrafilov Portuqaliyada keçirilən paraüzgüçülük üzrə dünya çempionatında qızıl, boccia üzrə paralimpiyaçımız Bəhruz Mirzəyev World Challenger turnirində,  Xorvatiyada keçirilən “Intercontinental Challenger” çempionatında qızıl, Arif Niftullayev Serbiyada təşkil olunan yunan-Roma güləşi üzrə dünya çempionatında bürünc, Məhəmməd Qasımzadə Rumıniyadakı yunan-Roma güləşi üzrə Avropa çempionatında qızıl, Elgiz Məmmədov Bolqarıstanda veteranlar arasında yunan-Roma güləşi üzrə dünya çempionatında gümüş, Nərmin Abdinova 16 yaşadək yeniyetmələr arasında Naxçıvanda keçirilən Ümumdünya Şahmat Olimpiadasında qızıl, Əmrah Əmrahov Xorvatiyada keçirilən yunan-roma güləş üzrə Avropa çempionatında bürünc, Zəfər Əliyev Yunanıstanda  keçirilən çimərlik  güləşi üzrə gənclərin Avropa çempionatında  qızıl, Ruminiyadakı Dünya çempionatında gümüş, Rahid Həmidli Bolqarıstanda keçirilən yunan-Roma güləşi üzrə Beynəlxalq turnirdə bürünc medal qazanıb. Masallı rayonunu təmsil edən “Ərkivan” futbol komandası həvəskarlar liqası üzrə respublika çempionu adına sahiblənib. Ümumiyyətlə ötən il dünya, Avropa, respublika  və zona  yarışlarında 213 uşaq, yeniyetmə və gənc  idmançı  rayonumuzu təmsil edib ki, onlardan 38 nəfəri birinci, 25-i ikinci, 50 idmançımız isə üçüncü yerə layiq görülüb...

Milli Məclisin üzvü Məşhur Məmmədov, Yeni Azərbaycan Partiyası Masallı rayon təşkilatının sədri Seyfəddin Əliyev, Masallı Regional Mədəniyyət İdarəsinin rəisi Bəxtiyar Qılıncov, sərbəst güləş üzrə dünya və Avropa çempionu Ruzanna Məmmədova, gənc təlimçi, Şuşa-Xankəndi yolunda keçirilən aksiyanın iştirakçısı Rafət Şirəliyev, M.Qarayev adına Sığıncaq kənd tam orta məktəbinin onbirinci sinif şagirdi, coğrafiya fənni üzrə olimpiada qalibi Rövnəq Cəfərov bu gün ölkəmizdə gənclər siyasətinin mahiyyət və keyfiyyətcə yeni mərhələsini yaşadığını,  gənclərin mənəvi inkişafı, vətənpərvərlik tərbiyəsi, xarici ölkələrdə təhsili, gənclər təşkilatlarının formalaşması və inkişafı üçün yaradılan şərait və imkan, həmçinin bu sahəyə böyük diqqətin olduğunu vurğulayıblar.

Gənclərin cəmiyyətdə tutduğu mövqedən danışan natiqlər onları bundan sonra da bütün sahələrdə fəal olmağa çağırıblar.

Çıxışçılar gəncləri bayram günü münasibətilə təbrik edib, onlara xoşbəxt gənclik, sağlamlıq və uğurlu gələcək arzulayıblar.

Sonra rayonun ictimai-siyasi həyatında fəallıq göstərən bir qrup gəncə və ictimaiyyət nümayəndəsinə Masallı RİHB, rayon gənclər və idman idarəsi tərəfindən fəxri fərmanlar, hədiyyələr təqdim edilib.

Tədbir bədii hissə ilə yekunlaşıb.

Akif AĞAYEV