Kənd qızları üçün Masallıdakı müəssisə və qurumlara infotur təşkil edilib
 
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyilə “Masallıda Qadınların Sosial İnkişafına Dəstək” İctimai Birliyinin icra etdiyi “Kəndlərdə yaşayan qızların təhsilə və peşə seçiminə təşviqi” layihəsi çərçivəsində infotur təşkil edilib.
İnfoturda Masallı rayonunun Qızılağac, Köhnə Alvadı, Qəriblər, Yeyənkənd və Şərəfə kəndlərindən 20 məktəbli qız iştirak edib.
İnfotur çərçivəsində gənc qızlar Masallı rayon Heydər Əliyev Mərkəzində yerləşən Masallı Qadın Resurs Mərkəzini, Gənclərin İnkişaf və Karyera Mərkəzinin Lənkəran-Astara Regional nümayəndəliyinin Masallı bölməsini, Heydər Əliyev Mərkəzində rəssamlıq sahəsi üzrə fəaliyyət göstərən mərkəzini, Masallı Sənaye Məhəlləsini, Masallı Təhsil Fondunu və Masallı ASAN həyat kompleksində yerləşən İnsan Hüquqları üzrə Müvəkkilinin (Ombudsman) Cənub Regional Mərkəzini ziyarət ediblər.
Məlumat üçün bildirək ki, layihənin birinci mərhələsində Masallı rayonunun adı çəkilən 5 kəndinin hər birində ümumilikdə 128 qızı əhatə edən peşə və təhsilə marağın artırılması üzrə təlimlər keçirilib. Təlimlərdən seçilən 20 fəal qız layihənin infotur hissəsinə cəlb edilib.
Layihənin məqsədi Masallı rayonunun kəndlərində yaşayan qızların təhsilə və peşələrə marağının artırılması, onlara rayonun sosial-iqtisadi potensialını tanıtmaqdır.
 
Akif AĞAYEV