Rumıniyanın paytaxtı Buxarest şəhərində Azərbaycan təmsilçilərinin də iştirakı ilə yeniyetmələr arasnda qılıncoynatmanın sablya növü üzrə “Riposta Cup” turniri keçirilib. Turnidə Azərbaycan həm qızların, həm də oğlanların yarışında iştirak edib.

Qızlar arasında ölkəmizi Zərifə Hüseynova. Valentina Zeynalova, Fidan Quliyeva, Fərəhvə Alla Həsənovalardan ibarət beşlik, oğlanların yarışında isə Nahid Məmmədli, Timur Husnaddinov və Rəsul Əliyevdən ibarət trio təmsil edib. Təəssüflər olsun ki, təmsilçilərimiz nə fərdi. nə də komanda yarışında fərqlənə bilməyiblər. Qızlardan nisbətən yaxşı nəticə göstərən Zərifə Hüseynova olub. Yeniyetmə müşketyorumuz qrup mərhələsində keçirdiyi 6 görüşün hamısını udsa da, mübarizəni sona qədər dvam etdirə bilməyib. Pley-offda müvafiq ardıcıllıqla rumın, fransız, macar və amerikalı rəqiblərinə qalib gələn Zərifə bürünc medalın bir addımlığında Macarıstan idmançısı Nadin Totza 9:15 hesabı ilə uduzub.

Digər təmsilçilərimizdənsə, qrup mərhələsində 4 qələbə qazanan Valentina Zeynalova 32-liyə yüksəlmək uğrunda keçirilən görüşdə Bolqarıstan qılıncoynadanı Mariela Georgievaya 9:15 hesabı ilə məğlub olub. Fərəh Abbasova və Alla Həsənova qrup mərhələsini adlasa da, pley-offda mübarizəni dayandırıb. Fidan Quliyeva pley-offa adlaya bilməyib.

Qızların komanda yarışına gəlincə, ilk görüşündə İspaniyanın ikinci komandasına 45:16 hesabı ilə qalib gələn komandamız növbəti mərhələdə ABŞ yığmasına 37:45 hesabı ilə uduzub.

Oğlan sablyaçıların şəxsi yarışında isə yuxarıda adları çəkilən triomuzdan heç biri qrup mərhələsini aşa bilməyib. Oğlanlarımız komanda yarışında isə Yunanıstanın 3-cü komandasına 41:45 hesabı ilə məğlub olaraq, mübarizəni erkən dayandırıb.

İNTİQAM Məmmədov