Kosmik fəzaya xalça dünyasından baxış

“NUR Art House” xalça qalereyası 2-6 oktyabr 2023-cü il tarixlərində Bakıda keçirilən 74-cü Beynəlxalq Aeronavtika Konqresi və konqres çərçivəsində keçirilən sərgidə uğurla iştirak edir. Dövlət səviyyəsində təşkil olunan tədbirdə qalereya yeni layihəsini “İntersputnik” Beynəlxalq Aerokosmik Rabitə Təşkilatının stendində gerçəkləşdirib. Milli mədəni irsimizin incisi olan Azərbaycan xalçasında kosmoqonik elementlərin rəngkarlıq əsərlərində müxtəlif texnikalarla təqdimatını özündə ehtiva edən layihəni Azərbaycan Respublikasının Əməkdar mədəniyyət işçisi, sənətşünaslıq üzrə elmlər doktoru, professor Röya Tağıyevanın rəhbərliyi ilə gənc və istedadlı rəssamlarımız, Azərbaycan Rəssamlar İttifaqının üzvləri Vüsalə Yunusova və Əli Qaffarlı həyata keçiriblər. Oktyabrın 2-də keçirilən təqdimat yerli və xarici ölkələrdən gəlmiş ziyarətçilərin diqqətini cəlb edib. Qeyd etmək lazımdır ki, “İntersputnik” Beynəlxalq Kosmik Rabitə Təşkilatının tələblərinə uyğun olaraq, sərgidə gənc rəssamlar iştirak edə bilərdilər. Gənclər arasında aeronavtika mövzusuna marağın artırılması, yeni biliklərin öyrənilməsi onların dünyagörüşünün zənginləşməsinə və maraq dairələrinin genişlənməsinə səbəb olub. Sərgi zamanı qalereyanı təmsil edən Umay Məmmədzadə qonaqlara gənc rəssamları təqdim edib, “NUR Art House” qalereyasının fəaliyyəti haqqında ətraflı məlumat verərək sualları cavablandırıb. Sonda seçimi qazanan gənc rəssamlarımıza mükafatlar təqdim olunub. 
Ölkəmizin kosmosun tədqiqi istiqamətində əldə etdiyi nailiyyətləri, mövzunun aktuallığını nəzərə alaraq professor R.Tağıyeva konqres çərçivəsində qonaqlara paytaxtımızın qədim tarixi ərazisində, ölkə əhəmiyyətli memarlıq abidəsində yerləşən “NUR Art House”da daha bir sərgini təqdim etmək qərarına gəlib. Bu sərginin orijinallığı yaş məhdudiyyətinin olmaması və rəngkarlıq nümunələri ilə yanaşı, mövzu ilə bağlı xalça və dekorativ-tətbiqi sənət əsərlərinin də bir araya gəlməsi ilə bağlıdır. Görkəmli Azərbaycan şairi və mütəfəkkiri Nizami Gəncəvi dühasından ilhamlanaraq oktyabrın 4-də açılan sərgidə konqres iştirakçıları, şəhərimizin qonaqları və sənətsevərlər Azərbaycanın görkəmli sənətkarları, “Azərbaycan xalçaçıları” İctimai Birliyi İdarə Heyətinin üzvləri Eldar Hacıyevin “Qarabağ atları”, “Üfüqdə yaranan alov”, AXİB üzvü Sevər Məmmədovanın “Mən sağ qalacağam”, rəssam Kamila Muradovanın “Nur və qaranlıq”, “Adam”, “Spiral”, “Kosmosun gücü”, “Sirr”, “Yaradıcı partlayış”, “Ulduz” adlı bir-birindən gözəl əsərlərini izləyə bilərlər. Sərginin ilk günü ekspozisiya ilə tanış olan “İntersputnik” Beynəlxalq Kosmik Rabitə Təşkilatının baş direktoru Kseniya Drozdova, İctimaiyyətlə Əlaqələr üzrə mütəxəssis Svetlana Stolnikova qalereyada professor Röya Tağıyeva və sənətkarlarla görüşüb. Onların əsərləri haqqında fikirlərini dinləyib. Qeyri-adi qüvvəyə və bənzərsiz gözəlliyə malik Azərbaycan xalçasının ecazkar cəzibəsinə düşüblər. 
Qeyd edək ki, sərgi oktyabr ayının 6-na kimi davam edəcək. Giriş sərbəst, ünvanımız isə dəyişməzdir: İçərişəhər, Qəsr küçəsi, 27.