“Xalqımızın milli birliyinin möhkəmlənməsində mənəvi dəyərlərimizin rolu”

Dini Qurumlarla İş üzrə Dövlət Komitəsinin (DQİDK) Lənkəran bölgəsi üzrə şöbəsi, Sosial Xidmətlər Agentliyinin Lənkəran-Astara Regional Filialı, Lənkəran-Astara Regional Təhsil İdarəsinin Lerik rayonu üzrə təhsil sektorunun təşkilatçılığı ilə “Xalqımızın milli birliyinin möhkəmlənməsində mənəvi dəyərlərimizin rolu” mövzusunda tədbir keçirilib. 

Lerik rayon M.Qafarov adına Siyov kənd tam orta məktəbində keçirilən tədbirdə DQİDK-nin Lənkəran bölgəsi üzrə şöbəsinin əməkdaşları Emin Həmidli, Ağaəli Həsənov, Sosial Xidmətlər Agentliyinin Lənkəran-Astara Regional Filialının müdiri Ramin Hüccətov, şəhid ailələri, məktəbin direktoru İlham Əmirov, müəllim və şagirdləri iştirak ediblər. 

Əvvəlcə Vətənimizin suverenliyi və ərazi bütövlüyü uğrunda şəhid olan qəhrəmanlarımızın əziz xatirəsi bir dəqiqəlik sükutla yad olunub.

Çıxışlarda bildirilib ki, Ulu öndər Heydər Əliyev milli-mənəvi dəyərlərimizin zənginləşməsi istiqamətində yeni mərhələnin əsasını qoyub: “Bu təməl üzərində möhtərəm Prezidentimiz İlham Əliyev tərəfindən milli-mənəvi dəyərlərimizin qorunub saxlanılmasına xüsusi diqqət və qayğı göstərilir. Azərbaycanda yaşayan müxtəlif millət və dinlərin nümayəndələri arasında tarixən həmrəylik, sülh və vəhdət hökm sürür, xalqımızın milli-mənəvi dəyərlər sistemində humanizm və sülhsevərlik əsas yer tutur...” 

44 günlük Vətən Müharibəsində Müzəffər Ali Baş Komandanımızın rəhbərliyilə Azərbaycan ordusunun parlaq qələbəsilə Ermənistan tərəfindən işğal edilmiş torpaqlarımızın geri qaytarıldığını gündəmə gətirən natiqlər qazanılan zəfərdə milli-mənəvi dəyərlərimizin mühüm rolunu dönə-dönə vurğulayıblar.

Çıxışlar zamanı yeniyetmə və gənclər arasında dəyərlərimizin təbliğinin vacibliyi, ölkəmizdə tarixən mövcud olan milli və dini həmrəyliyin, tolerant və multikultural ənənələrin xalqımızın həyat tərzini təşkil etdiyi diqqətə çatdırılıb.

Müzakirələrlə davam edən tədbirdə mövzu ilə bağlı iştirakçıları maraqlandıran suallar cavablandırılıb.

Akif AĞAYEV