Rəhim Tağıyev adına Masallı Tarix-Diyarşünaslıq Muzeyi, Masallı Rayon Gənclər və İdman İdarəsi, Gənclərin İnkişaf və Karyera Mərkəzinin (GİKM) Masallı nümayəndəliyinin birgə təşkilatçılığı ilə 2 fevral Azərbaycan Gəncləri Gününə həsr olunmuş “Heydər Əliyev və Azərbaycan gəncliyi” adlı tədbir keçirilib.

Muzeydəki tədbirdə təşkilatçı müəssisələrin əməkdaşları, qazilər və gənclər iştirak ediblər.

Əvvəlcə şəhidlərimizin xatirəsi bir dəqiqəlik sükutla yad olunub.

Muzeyin direktoru, Əməkdar mədəniyyət işçisi Əntiqə Tağıyeva Gənclər Günü münasibətilə iştirakçıları təbrik edərək bu əlamətdar günün kütləvi şəkildə qeyd olunmasının Ulu Öndər Heydər Əliyevin adı ilə bağlı olduğunu, məhz Ümummilli Liderimizin hakimiyyəti illərində dövlət gənclər siyasətinin əsasının qoyulduğunu diqqətə çatdırıb.

Rayon gənclər və idman idarəsinin rəisi Sabiq Cahangirov, qazi Talıb Qəzənfərli, GİKM Masallı nümayəndəliyinin direktoru Aynur Tağıyeva, nümayəndəliyin tədbirlər və layihələr üzrə mütəxəssisi Məlik Nuriyev Ümummilli lider Heydər Əliyevin xalqımız qarşısındakı xidmətlərini yüksək qiymətləndirərək bu dahi şəxsin bizə bəxş etdiyi müstəqillikdən, elm və təhsilin inkişafından, ölkəmizin siyasi-iqtisadi yüksəlişindən, bu gün ölkəmizdə idarəetmə bacarığı ilə seçilən intellektual, dünyagörüşlü yeni nəslin yetişməsindən, gənclərə olan diqqət və qayğıdan danışıblar.

Sonda bir qrup gəncə Təşəkkürnamələr təqdim olunub.

Akif AĞAYEV