Bu gün jurnalist-publisist Akif Ağayevin ad günüdür 

Bu gün, jurnalst-publisist Akif Ağayevin 53 yaşı tamam olur. 

İstedadlı yazar kimi daim öyrənməyə, ensiklopedik yaddaşını zənginləşdirməyə, jurnalistikanın incəliklərinə varmağa, janrların rəngarəngliyini artırmağa çalışır. O, bu istedadını hələ məktəb illərində, gəncliyində göstərə bilmişdir. Ötən əsrin 80-ci illərində “Çağırış” (“Yeni həyat”) qəzetində yazıları vaxtaşırı olaraq dərc edilib. Onun yazdığı  şeir, qəzəllər, bədii ricətlər, lətifələr daim qəzet səhifələrində və almanaxlarda çap olunub. Hazırda da bu mətbu orqanda çalışır. “Yeni həyat” ictimai-siyasi qəzetinin və eyni adlı saytın əməkdaşı, “Azpress.az” saytının xüsusi müxbiridir.  

Akif Ağayev yazılı və elektron mətbuatda Masallı rayonunun ictimai-siyasi, iqtisadi həyatında fəallıq göstərməklə yanaşı cənub regionunu təmsil və təbliğ edən operativ jurnalistlərdəndir. 

AJB-nin, Azərbaycan İdman Jurnalistləri Assosiasiyasının üzvü Akif Ağayev yorulmadan çalışan yazar, KİV-də tanınan fəal müxbirlərdəndir.  O, Azərbaycan Jurnalistlər Birliyinin H.B.Zərdabi Diplomuna, Azərbaycan İdman Jurnalistləri Assosiasiyasının “2017-ci ilin idman yazarı” media mükafatına layiq görülüb. Jurnalistlik  fəaliyyəti dövründə aldığı Fəxri fərmanlar, “Təşəkkürnamələr” onlarcadır. 

Mətbuatda publisistik yazıları ilə çıxış edən A.Ağayevin potensialı böyükdür. O, da təcrübəli həmkarları kimi jurnalistika ənənəsinə sadiqliyini əməli fəaliyyəti, kəsərli yazıları, qazandığı oxucu rəğbəti və digər müsbət xüsusiyyətlərilə sübut etməyə çalışır. İctimai-siyasi, ədəbi və digər mövzulu yazıları ilə yanaşı regionun idman tarixini, bölgədə, xüsusilə Masallıda keçirilən kütləvi idman yarışlarını qəzet və saytlarda işıqlandıran istedadlı jurnalistdir. 

Vətənpərvərlik mövzusundakı məqalələri də daha çox diqqət cəlb edir. Şəhid analarının, əmək və müharibə veteranlarının görüşünə gedir, qəhrəmanlar tarixini gənc nəslə çatdırmağa çalışır. Xüsusilə yurd yerlərimizin tarixini, elm, mədəniyyət və əmək adamlarının keçdiyi möhtəşəm yolu, onların fəaliyyətini öyrənmək üçün axtarışlar edir.

Daim yaradıcılıq axtarışında olan Akif Ağayev qələmini dünya şöhrətli pəhləvanın həyatını, ömür yolunu işıqlandırmaqda sınayıb. O, idman tariximizdə şərəfli iz buraxmış, Masallı yunan-Roma güləş məktəbinin yaradıcısı, SSRİ idman ustası, Əməkdar məşqçi, respublika dərəcəli hakim, mərhum pəhləvan Nadir Ağayevin mənalı həyat və fəaliyyətindən bəhs edən “Pəhləvanın salnaməsi“ adlı kitabının və eyni adlı sənədli filmin müəllifidir. Akif böyük zəhmətə qatlaşaraq, monumental bir əsər yaradıb. Gözəl tərtibata malik yarım əsrin yaddaqalan hər saatını, gününü fotoobyektin yaddaşında ehtiva edən şəkillərlə, xatirə və şeirlərlə, eləcə də güləş haqqında və digər xronoloji məlumatlarla zəngin kitab və film geniş oxucu və tamaşaçı kütləsinin marağını tam təmin edir.  

Akif Vaqifoğlunu ad günü münasibətilə təbrik edir, qələmin iti olsin deyirik, ona cansağlığı, yeni yaradıcılıq uğurları arzulayırıq.