Vüsalə Məmmədova: 

“StudentFest 2023” tələbə düşərgəsində qazandığım təcrübəmdən danışdım

Dünən "StudentFest2023" yay düşərgəsində gələcəyin jurnalistləri ilə görüşdük. Müsahibə janrında qazandığım təcrübəmdən danışdım.

Müsahibəyə necə hazırlaşmalıyıq?

Hansı incə nüansları gözdən qaçırmamalıyıq?

Mən uğurlu müsahibənin sirlərini nədə görürəm?

Və daha bir neçə mühüm suala aydınlıq gətirməyə çalışarkən xəbər tutduq ki, bir “Sabaha saxlamayaqlıq”, yəni 80 dəqiqədir danışıram Baxmayaraq ki, ilk sözüm “dostlar, darıxanda deyin, yekunlaşaq”, olmuşdu. Ancaq sonacan qızğın müzakirə getdi. Hiss elədim ki, məzuniyyət uzun çəkdi, #SabahaSaxlamayaq üçün darıxmışam

Tələbələrə bu günlərdə mənə müsahibə üçün müraciət edən həmkarımızın yanaşmasını misal çəkdim və gənclərlə bu üslubun yanlış və doğrularını birlikdə müzakirə etdik. Qərara gəldilər ki, jurnalistin yanaşması kökündən yanlış olduğu üçün ona müsahibə vermək lazım deyil. Razıyam, haqlı idilər!

Ümumiyyətlə, gənclərdə çox sağlam təhlil bacarığı gördüm və bəyəndim.

Universitet onlara sevib-seçdikləri ixtisası necə görməyi öyrədir. Tövsiyə etdim ki, bu sevgiyə çox da güvənməyin. Çalışın, nə qədər gec deyil, özünüzdə gördüyünüz işi sevmək bacarığını da inkişaf etdirin. Şəxsi nümunəm üzərindən misal çəkdim ki, belə olduqda bacarığınız daha da önə çıxacaq. Bu şəxsiyyətinizin də formalaşmasına ciddi təsir edəcək, xarakteriniz, duruşunuz fərqli olacaq. Ən önəmlisi, özgüvəniniz tam olacaq!

Özaramızdır, sevdiyin işi görməyə nə var ki?

Doğru, bu mövzuda bir qədər tərəddüdlü olduqlarını gördüm. Dərhal razılaşmalarını da istəməzdim, axı hələ onların arzuların - sevginin arxasınca getməli olduqları yaşlarıdır. Həyat isə sürprizlərlə doludur və bir gün sevginin arxasınca getməyin yox, sevgi ilə addımlamağın doğru olduğunu öyrədir

Gənc həmkarlarımı sevdim! Onları tanımaq çox xoş oldu. Dəvət üçün təşəkkür! Uğurlar, əziz gənclər!

Sevgilər!