Kərim Kərimli:

...Laçın şəhərinə təzə çatmışdıq

Bu, mənim 31 il 4 ay ayrılıqdan sonra Laçına ilk gəlişim idi.

Axırıncı dəfə Laçın şəhərində 1992-ci ilin aprel ayında olmuşdum.

Kiçik gəzintidən sonra rayon mərkəzində qurulmuş böyük çadırın – müasirlərin "kamp" dediyi, Laçının ziyalı ağsaqqallarından olan Gazanfar Huseyn müəllimin isə "seyrəngah" adlandırdığı qərargahın yanına gəldik.

Buraya Laçına qayıdanların yeni dəstəsi gəlmişdi və biz də bu xoşbəxt adamların şən çöhrələrinə baxmaq, bu səadətin necə olduğunu görmək istəyirdik.

Elə bu zaman yanımızda bir avtomobil dayandı. Maşından dünyaca məşhur Rza Diqqəti və Azərbaycan Respublikası Prezidentinin Laçın rayonunda xüsusi nümayəndəsi Məsim Məmmədov düşdülər.

Rza Diqqəti ilə də ilk və son dəfə 31 il 4 ay əvvəl – 1992-ci ilin aprel ayında Şuşada görüşmüşdüm.

Şuşaya gələn bir çox digər jurnalistlər kimi onu da mən qarşılamış, bələdçilik etmiş, getmək istədiyi yerlərə aparmış, peşə fəaliyyətini yerinə yetirməsi üçün lazım olan köməyi göstərmiş və ondan müsahibə alıb "Qarabağ" qəzetində dərc etdirmişdim.

Bizim qucaqlaşıb görüşməyimizə hörmətli Məsim müəllim də ayaq saxladı. Rza bəy məni ona da təqdim edib haqqımda qısa məlumat verdi.

Məsim Məmmədov ikimizin də əlini sıxıb:

– Çox şad oldum, – dedi. – Vətənimiz, xalqımız, dövlətimiz yolunda çəkdiyiniz əziyyətlərə görə ikinizə də təşəkkür edirəm. Çox sağ olun!

Bu qəribə təsadüfdən çox qəribə hisslər keçirməyə başladım:

– İşğaldan azad olmuş Laçın şəhərinə ilk gəlişim;

– Otuz bir il dörd ay əvvəl Şuşada ilk və son dəfə görüşdüyüm gözəl insanla yenidən və qəfil görüş;

Və...

– 12 fevral 1988-ci ildən – Qarabağ hadisələri başlayandan bəri ötən düz 35 il 6 ay ərzində keçən bütün fəaliyyətimə görə ilk dəfə olaraq rəsmi dövlət adamının – Prezidentin xüsusi nümayəndəsinin dilindən "Sağ ol!" eşitməyim!..