Kərim Kərimli:

Günahsız şəxsin ömrünə son qoyan şəxsləri QATİL adlandırmaq olarmı???

Bu yazını dərin kədər içində yazıram.

Sarsıntımın səbəbi, əlbəttə, əziz dostumu vaxtsız itirməyimdir.

Ancaq təkcə bu deyil.

Bu il mart ayının 21-də əziz Hacı Vahid Hüseynovn 61 yaşı tamam olmuşdu. Deməli, vəfat edən gün - 6 avqustda onun yaşı 61 il 4 ay 15 gün olub.

Niyə bu cür təfərrüata varıram?

Vahid müəllimgilin ailəsi 1992-ci ilin may ayında Şuşanın işğalından az sonra Göyçay şəhərində el arasında “RTS” deyilən idarənin həyətində məskunlaşmışdı.

Ötən 30 il ərzində də fasiləsiz olaraq məhz həmin yerdə yaşayıblar.

Təxminən 10 ildir ki, Vahid müəllimin və onunla bərabər həmin yerdə yaşayan qardaşı Kamil Hüseynovun ailəsini oradan çxarmağa çalşırlar və onlara hər cürə qansızcasına təzyiq və təsir göstərirlər.

Hacı Vahidgil 1998-ci ildə Prezident Heydər Əliyevin və 2004-cü ildə də Prezident İlham Əliyevin verdiyi müvafiq fərmanları və Şuşanın hələ də işğalda oldğunu və başqa yaşayış yerlərinin olmadığını əsas götürərək müvəqqəti məskunlaşdıqları yeri tərk etmək istəmirdilər.

Onları oradan çıxarmaq istəyən şəxslər Göyçay məhkəməsinə müraciət etdilər və…

…Və hər şeydən göründüyü kimi ipək kimi yumşaq, uşaq kimi həssas olan bir insanı, Şuşa uğrunda döyüşmüş bir kişini, II qrp əlili xəstə saldılar və axırda da ölüm həddinə çatdırdlar.

Şuşa işğaldan azad olunandan sonra isə Vahid müəllim özü məhkəməyə gedərək demişdi ki, narahat olmayın, iddiaçılara da deyin, Allaha şükür torpağımız işğaldan azad olunub, onsuz da köçüb öz yurdumuza qayıdacağıq.

Məhkəməçilər isə buna qane olmayaraq ondan müvəqqəti məskunlaşdıqları yeri dərhal tərk etməyi tələb etmişdilər...

"Dərhal necə çıxaq? Çıxıb hara gedək? Bu boyda ailə, təsərrüfat... Axı Şuşaya hələ köç başlamayıb!" - o da belə cavab vermişdi.

Ən maraqlısı da budur ki, Göyçay məhkəməsinin hakimi İbrahim Fəttahov nə Prezidentlərin imzaladıqları rəsmi dövlət sənədlərini saya salır, nə də adına “HÜQQ” deyilən bir dəyəri vecinə alırdı.

Vahid müəllim qalmışdı məhkəmələrin qapılarında.

Şəki Apellyasiya Məhkəməsi, Azərbaycan Respublikasının Ali Məhkəməsi işə yenidən baxır, Göyçay məhkəməsinin qərarını ləğv edir, qüvvədən salırdı.

Ancaq Göyçay məhkəməsi qanunu qatlayıb, gündəyməz bir yerə qoyaraq işə yenidən baxırdı...

Beləliklə də kişini infarkt elədilər...

Vahid müəllimi ən çox yandıran, özündən çıxardan və dəfələrlə sarsıdaraq yıxılmasına, əsəbdən özündən getməsinə səbəb olan əsas məsələ o idi ki, Fəttah dayının qəbul etdiyi qərarda yazılmışdı ki, Hüseynovlar ailəsinin həmin yerdə çox sonralar məskunlaşdığı barədə dövlət orqanı tərəfindən verilmiş müvafiq arayış var.

Vahid müəllim tələb edirdi ki, həmin arayışı ona da göstərsinlər, ona cavab verirdilər ki, sənin o arayışı görməyin vacib deyil.

İkinci məsələ də var idi.

Məhkəmə qəbul etdiyi sənəddə göstərirdi ki, guya Hüseynovlar buranı zorla zəbt ediblər. Halbu ki, bunu təkcə deməyin özü bir absurddur.

...Və ən sonuncu absurd qərardan sonra isə daha dözə bilmədi və...

Dostumun cavan və vaxtsız ölümündən sarsılmışam.

Amma Azərbaycan Respublikası adından qərar qəbul edən, işi on il süni surətdə uzadaraq bir insanın ölümünə səbəb olan hakim və məhkəmə heyətinin bu cür addımından daha çox sarsılmışam.

Siz deyin, İbrahim Fəttahovu, onun komandasını və onlarla sövdələşərək qanunsuz iddia qaldıran və yenə də qanunsuz yollarla prosesi təkrarlayaraq bir günahsız şəxsin ömrünə son qoyan şəxsləri QATİL adlandırmaq olarmı???