Cüdoçuların yeni mövsümə start berəcəyi bir vaxtda Avropa Cüdo Federasiyası tatami ustalarının qitə üzrə hazırki reytinq cədvəlini açıqlayıb. Maraqlıdır ki, Köhnə Qitənin reytinq cədvəlinə liderlik edən cüdoçular arasında azərbaycanlı Balabəy Ağayev (60 kq) də yer alıb. O, dünya reytinq cədvəlində isə Asiya təmsilçiləri - Yunq-Vey Yanq (Tayvan), Ryucu Naqayama (Yaponiya) və Xa-Rim Limdən (C.Koreya) sonra 4-cüdür. Xatırladaq ki, Balabəy Ağayev ötən mövsüm müvafiq ardıcıllıqla Portuqaliya Qran-Prisində ikinci, Bakıda keçirilən "Böyük Dəbilqə"də birinci, Abu-Dabi "Dəbilqə"sində üçüncü, Yerusəlimdə təşkil edilən "Masters"də və Konyanın ev sahibliyi etdiyi İslamiada-2022-də birinci olub. 

Yeri gəlmişkən, yanvarın 27-də Portuqaliyada startı veriləcək Qran-Pri ilə 2023-cü il mövsümünə start veriləcək. 3 gün davam edəcək turnirdə Azərbaycan 7-si qadın olmaqla 16 tatami ustası ilə təmsil olunacaq. Məşqçilər korpusu bu turnirdə kişilərdən Turan Bayramov, Nazir Talıbov (hər ikisi 60 kq), Yaşar Nəcəfov (66 kq), Vüsal Qələndərzadə, Nurlan Osmanov (hər ikisi 73 kq), Rüstəm Orucov (yeni çəkidə 81 kq), Vüqar Talıbov (90 kq) və Camal Qamzatxanova (+100 kq), zəiflərdənsə, Leyla Əliyeva, Könül Əliyeva (hər ikisi 48 kq), Gültac Məmmədəliyeva, Aydan Vəliyeva (hər ikisi 52 kq), Fidan Əlizadə (57 kq), Aytac Qardaşxanlı (63 kq) və Südabə Ağayevaya (70 kq) özünü sınamaq imkanı verib. 

İNTİQAM Məmmədov