"Orta əsr Ağsu şəhərində sənətkarlıq irsi" adlı elmi seminar keçirilib

24 iyun tarixində Ağsu şəhər Heydər Əliyev mərkəzində Mərkəzin və "Orta əsr Ağsu şəhəri" Dövlət Tarix-Mədəniyyət Qoruğunun təşkilatçılığı ilə Ümummilli Lider  Heydər Əliyevin 100 illiyinə həsr olunan "Orta əsr Ağsu şəhərində sənətkarlıq irsi" adlı elmi seminar keçirilib.Tədbirdə Ağsu Rayon İcra hakimiyyətinin ictimai-siyasi  məsələlər şöbəsinin müdir müavini Kənan Tacızadə, Ağsu rayon Gənclər və İdman idarəsinin rəis müavini Rəşad Osmanov, Mədəni İrsin Qorunması, İnkişafı və  Bərpası  üzrə Dövlət Xidmətinin Qəbələ Regional İdarəsinin nümayəndəsi, Ağsu rayonu üzrə  abidə mühafizəçiləri Allahverdi Qəmbərov və Pərviz Osmanov, Ağsu şəhər Heydər Əliyev mərkəzinin rəhbərliyi və əməkdaşları, İsmayıllı regional Mədəniyyət idarəsinin Ağsu rayonu üzrə  baş məsləhətçisi Cavanşir Şeydazadə, Ağsu Tədris Mərkəzinin direktoru Güvənc Mirzəxanov, "Azərmətbuatyayım" ASC-nın Ağsu rayon sahə rəisi Məlahət İbrahimova,  Ağsu rayon Mərkəzi kitabxanasının Bibiloqrafiya şöbəsinin müdiri Leyla Abbasova və əməkdaşları, Ağsu rayon Mədəniyyət mərkəzinin və Ağsu rayon Musiqi məktəbinin əməkdaşları iştirak ediblər.
İlk olaraq Heydər Əliyev mərkəzinin direktoru Reyhanə Tacızadə tədbir iştirakçılarını Heydər Əliyev mərkəzi və mərkəzdə fəaliyyət göstərən informasiya texnologiyaları kabineti, “Heydər Əliyev irsi” kitabxanası və Mərkəzlə Azərbaycan Dövlət Kənd Təsərrüfatı Muzeyi ilə birgə təşkil etdiyi “Ulu Öndər-100” adlı sərgi, Mərkəzin nəşrləri və s. ilə tanış edib. AMEA  Arxeologiya, Etnoqrafiya və  Antropologiya  İnsitutunun aparıcı elmi işçisi, tarix üzrə fəlsəfə  doktoru  Fariz Xəlilli Ümummilli Lider  Heydər Əliyevin 100 illiyinə həsr olunan “Bələdiyyələr Tarixi: Beynəlxalq I Gəgəli simpoziumu” haqda məlumat verib.
Daha sonra elmi seminar öz işinə başlayıb. Ağsu Rayon İcra hakimiyyəti ictimai-siyasi  məsələlər şöbəsinin müdir müavini Kənan Tacızadə elmi seminarların əhəmiyyətini qeyd edib və son illərdə mədəniyyət tədbirlərinin daha səmərəli keçdiyini, mədəniyyət və təhsil müəssisələri arasında əlaqələrin genişləndiyini nəzərə çatdırıb.Ağsu qoruğunun direktoru Şölə Bayramova tədbir iştirakçılarını salamlayıb və  tədbirin keçirilməsində verdikləri dəstəyə görə Ağsu rayon icra hakimiyyətinə, Ağsu şəhər Heydər Əliyev Mərkəzinə və tarixçi alimlərə minnətdarlığını bildirib.Dr. Fariz Xəlilli "Orta əsr Ağsu şəhərində  sənətkarlıq irsi" adlı çıxışında belə elmi seminarların təhsil müəssiələrində də keçirilməsinin vacibliyini, gənclərin Ağsunun tarixi, onun mədəniyyəti haqqında daha çox məlumat əldə etməsi baxımından əhəmiyyət kəsb etdiyini vurğulayıb. 2010-cu ildən 3 il ərzində aparılan qazıntılar haqqında məlumat verən F.Xəlilli orta əsr Ağsu şəhərini öyrənərkən mədəni irs kimi deyil, həm də şəhər topoqrafiyasının öyrənilməsi nümunəsi kimi qiymətləndirdiklərini qeyd edib. O bildirib ki, orta əsr Ağsu şəhərinin aşkar edilməsi zamanı sənətkarlıq çox inkişaf edib və 3-cü qazıntı sahəsinin sənətkarlıq  sahəsi olduğu məlum olmuşdur. O, sənətkarlı məhəlləsi haqqında məlumat verib və şəhərdə yolların  sənətkarlıq məhəllərinə görə qurulmasına, yolların  sadəcə sərq-qərb istiqamətində mövcudluğuna, 16000 eksponatdan 13 000  sənətkarlıq emalatxanasından aşkar edilməsinə, bir neçə dəmirçi emalatxanasının, dəmirçi sexi ilə əlaqədə işləyən  misgərlik sexi və sümük işləmə sexinin də üzə çıxarılmasına diqqət çəkib. Arxeoloji tədqiqatlarla və tapıntılarla elmi innovasiya etdiklərini vurğulayıb. O, Ağsu şəhərində sənətkarlıq irsinin elmi innovasiyalar şəklinə salınmasını diqqətə çatdırıb. Daha sonra  tarixçi Sənan Nemətovun "Daş məmulatı və daşişləmə sənəti" adlı məruzəsi dinlənilib. O, orta əsr Ağsu şəhərinin tədqiqatları zamanı aşkarlanmış daş məmulatlarından danışaraq, Şamaxı kəndlərində XX əsrin 80-ci illərinədək istifadə olunan, evlərin üstünü palçıqla örtmək üçün tətbiq edilən girgino haqda məlumat verib. O, qeyd etmişdir ki, XVIII əsrdə inkişaf edən misgərlik, daşişləmə sənəti, dəmirçilik Ağsunun etnoqrafiyasıdır. S.Nemətov Orta əsr Ağsu şəhərində əsas tikinti materialının çaydaşı olmasını, bişmiş kərpicdən, eyni zamanda puç daş adlandırılan, Şirvan, Aran memarlığına xas olan əhəng daşlarından istifadə olunduğunu bildirib.  S.Nemətov trap formalı daşa diqqət çəkərək,  səki qırağı suların axıdılması və ya hamamlarda trap kimi istifadə olunduğunu qeyd edib.O əlavə edib ki, XVIII əsrdə Ağsu ustaları təkcə tikinti işlərində deyil, həmçinin məişət və təsərrüfatda da daşdan hazırlanmış müxtəlif çeşidli əşyalardan geniş  istifadə etmişlər.
Seminarda Ağsu şəhərinin UNESCO-nun ipək yolu şəhərləri şəbəkəsinə daxil edilməsi və Ağsuda keçirilən Tərəkəmə Çərşənbəsi Festivalının UNESCO İpək Yolu festivalları siyahısına təklif edilməsi məsələsi vurğulanıb. Seminarın sonunda həmçinin iştirakçıların sualları cavablandırılıb.