Şəkidə “Azərbaycan və türk mədəniyyətinin inkişafında Şuşa ədəbi mühitinin rolu (ədəbi məclislər kontekstində)” mövzusunda seminar keçirilib

AMEA-nın Şəki Regional Elmi Mərkəzinin təşkilatçılığı ilə “Azərbaycan və türk mədəniyyətinin inkişafında Şuşa ədəbi mühitinin rolu (ədəbi məclislər kontekstində)” mövzusunda seminar keçirilib. 
Tədbir Azərbaycan Respublikasının Prezidenti İlham Əliyevin “Şuşa şəhərinin 2023-cü il üçün Türk dünyasının mədəniyyət paytaxtı” elan edilməsi ilə bağlı Sərəncamının icrasının təmin edilməsi məqsədilə AMEA Rəyasət Heyətinin 08 dekabr 2022-ci il tarixli qərarına əsasən təsdiq edilmiş “Tədbirlər Planı”na uyğun olaraq təşkil edib.
Seminarda Şəki REM-in Folklorşünaslıq və el sənətləri, Tarixi irs və etnoqrafiya, İctimaiyyətlə əlaqələr şöbələrinin, İ.S.Nakam adına Mərkəzi Kitabxananın əməkdaşları, eləcə də 10 və 18 saylı orta məktəblərin müəllimləri, ASAN xidmət könüllüləri, Şəki Regional Tibb Kollecinin tələbələri iştirak ediblər.

Tədbiri giriş sözü ilə açan Şəki MKS-nin İ.S.Nakam adına Mərkəzi Kitabxanasının Xidmət və abonoment şöbəsinin müdiri Dilbər Yaqubova elmi seminarın mövzusunun aktuallığından bəhs edib.
Sonra Folklorşünaslıq və el sənətləri şöbəsinin rəhbəri İradə Yusifova “Şuşa ədəbi məclisləri: funksiyalar və qarşılıqlı əlaqələr” mövzusunda məruzə ilə çıxış edib. O, həmin dövrün ədəbi mühiti, ədəbi və musiqi məclisləri, xanəndələr məclisləri, həmçinin yeni tipli üsuli-cədid məktəbləri, dərsliklərin tərtibi haqqında məlumat verib.  
Daha sonra Folklorşünaslıq və el sənətləri şöbəsinin aparıcı elmi işçisi, fil.ü.f.d., dosent Kamil Adışirinovun “Mir Möhsün Nəvvabın ədəbi və elmi fəaliyyəti” ilə bağlı məruzəsi dinlənilib. Məruzəçi Mir Möhsün Nəvvabın rəhbərlik etdiyi “Məclisi- Fəramuşan\Xamuşan” ədəbi məclisinin ideya və istiqamətləri, qəzəl ədəbiyyatı, mərsiyyə ədəbiyyatı haqqında məlumat verərək, Mir Möhsün Nəvvabın təzkirəçi, pedaqoq, uzaqgörən, coğrafiyaçı alim olduğunu vurğulayıb.
Seminarda “Abdulla bəy Asinin həyat və yaradıcılığı” mövzusunda məruzə ilə çıxış edən Folklorşünaslıq və el sənətləri şöbəsinin elmi işçisi Təranə Abdullayeva isə “Məclisi-Fəramuşan”ın üzvlərindən biri olan Abdulla bəy Asinin Şuşada anadan olması, ilk təhsilini mədrəsədə alması, Qasım bəy Zakirin nəvəsi olması, Nizami və Füzuli ənənələrinin davamçısı olması barədə məlumatları diqqətə çatdırıb. O, Abdulla bəy Asinin ədəbi irsi, lirikası, sadə və aydın dili və yaradıcılığında bədii təsvir və ifadə vasitələrindən geniş istifadəsindən bəhs edib.
Folklorşünaslıq və el sənətləri şöbəsinin kiçik elmi işçisi Tural Adışirinov “Natəvan və Kəminə yaradıcılıq əlaqələri” mövzusunda məruzə ilə çıxış edərək həmin dövrün üç möhtərəm şairəsi – Aşiq Pəri, Natəvan, Fatma xanım Kəminədən danışıb.  Məruzəçi Fatma xanım Kəminənin iki ədəbi məclisdə fəal iştirak etməsini, oların qəzəl yaradıcılığını xüsusi vurğulayıb.
Sonda AMEA-nın Şəki Regional Elmi Mərkəzinin elmi katibi Elşən Abdurahmanov İ.S.Nakam adına Mərkəzi Kitabxanasının rəhbərliyinə və iştirak edən qonaqlara təşəkkürünü bildirib, bu ədəbi məclislərin görkəmli bir nəsil yetişdirdiyini qeyd edib.