CAVADXAN QASIMOV: 

Naxçıvan Dövlət Universiteti: Yeni hədəflərə doğru

Naxçıvan Dövlət Universitetinin bütün sahələr üzrə əldə etmiş olduğu uğurlar, hər birimizi sevindirməyə davam etməkdədir. Ölkənin milli təhsil quruculuğunda, yeni keyfiyyət mərhələlərinin bir-birini əvəz etməsində, təhsil islahatlarının dinamik davamlılığında universitetimizin fəal rol alması günbə gün öz əhatəsini genişləndirməkdə, potensialını artırmaqda, mövqeyini isə daha da gücləndirməkdədir. Bu isə, təbii olaraq, ali məktəbin istər tədris, istər elm, istərsə də təcrübi proseslərinin düzgün əlaqələndirilməsindən və onun perspektivliliyinin artırılmasında xəbər verməkdədir.

Çox əlamətdar haldır ki, artıq Naxçıvan Dövlət Universitetinin milli təhsilimizin inkişafındakı rolu və hərəkətverici təsiri müvafiq istiqamət üzrə dövlət siyasətinin də uzunmüddətli perspektivlərində öz əksini tapmaqdadır. Bu gün, yəni 5 iyun 2023-cü il tarixində Azərbaycan Respublikası Prezidentinin imzalamış olduğu tarixi Sərəncamla “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı” təsdiq olunmuşdur. 8 bölmədən ibarət olan Dövlət Proqramı, özündə, bir çox aktual məsələlərlə yanaşı, eyni zamanda, muxtar respublikada:

- əlverişli biznes mühitinin yaradılması;

- Ticarətin inkişafı;

- İxracyönlü sənayenin inkişafı;

- Kənd təsərrüfatı məhsulları istehsalının və emalının inkişaf;

- Turizmin inkişafı;

- Elektrik enerjisi istehsalının və ixracının artırılması;

- İnfrastruktur təminatının inkişafı;

- Sosial sektorun inkişafı;

- İnsan kapitalının inkişafı;

- İnstitusional inkişaf;

- Ətraf mühitin mühafizəsinin gücləndirilməsi və digər müasir iqtisadi və sosial inkişaf mərhələsi üçün olduqca zəruri məsələlər yer almaqdadır. Qürurverici hal ondan ibarət olmaqdadır ki, Dövlət Proqramının İnsan kapitalının inkişafı bölməsində Naxçıvan Dövlət Universitetinin qarşıdakı inkişaf mərhələləri içərisində perspektivləri nəzərə alınmış və müəyyən olunmuşdur. Orada göstərilmişdir ki, Naxçıvan Muxtar Respublikasında ali təhsilin keyfiyyətinin artırılması məqsədilə Naxçıvan Dövlət Universiteti ilə digər ölkələrin ali təhsil müəssisələri arasında əməkdaşlıq gücləndiriləcək, birgə proqramlar təşkil olunacaq, həmçinin ali təhsil müəssisələrində yeni məzmunlu proqramların (SABAH, ingilisdilli tibb fakültəsi, tibbi tədqiqat klinikası və s.) tətbiqi üzrə layihələr həyata keçiriləcəkdir.

Təbii olaraq, bu, ölkəmizin elm və təhsil islahatlarının davamlılığında Naxçıvan Dövlət Universitetinin xüsusən də, son üç ildə qazanmış olduğu uğurlara verdiyi böyük qiymətin, etibarın və etimadın olduqca mühüm ifadəsidir. Eyni zamanda, müvafiq istiqamətlər üzrə dövlət siyasətinin şaxələndirilməsində ali məktəbimizə olan ümidlərin zəruri tərəflərini göstərməkdədir. Ali Məktəbin rektoru, dosent Elbrus İsayevin doğmalıqla, əzmkarlıqla, təcrübə ilə, inamla və peşəkarlıqla həyata keçirmiş olduğu tədbirlərin diqqətlə əhatə olunmasını bir daha göstərməkdədir. Təsadüfi deyildir ki, bir neçə gün bundan əvvəl, Naxçıvan Dövlət Universiteti (1001+) Böyük Britaniyanın “Times Higher Education Impact Rankings 2023” reytinq cədvəlində dünyanın ən yaxşı universitetləri arasında yer alması xəbərini də eşitdik və bu, ali məktəbimizin professor-müəllim heyətinin, elmi ictimaiyyətin və pedaqoji mühitin qürurla qarşılamış olduğu uğur oldu.

Beləliklə, Xalqımızın ümummilli lideri Heydər Əliyevin anadan olmasının 100-cü ildönümü münasibətilə həyata keçirilmiş olan mühüm tədbirlər üçün qürurverici töhvələr verən Naxçıvan Dövlət Universiteti, özünün uğurlarına yeni nəticələr əlavə etməkdədir. Təbii olaraq, bu uğurlar, elm və tədris proseslərində istər tənzimləmə, istər nəzəri əsaslandırma, istərsə də, təcrübi bacarıqların şaxələnməsində daha da aktual olacaq. Xeyirli olsun.