2023-cü il yanvarın 20-də Gənclər üçün Təhsil Mərkəzi (GTM) Qarabağ regional ofisinin əməkdaş və könüllüləri Ağcabədi rayonunda yerləşən Qəhrəmanlar parkını ziyarət edərək, ölkəmizin ərazi bütövlüyü, suverenliyi uğrunda canından keçən şəhidlərimizin xatirəsini ehtiramla yad ediblər.

Sonra 20 Yanvar faciəsinin 33-cü ildönümünə həsr olunmuş “20 yanvar həqiqətləri” mövzusunda dəyirmi masa keçirilib.

AZpress.AZ- ın bölgə müxbiri xəbər verir ki,   tədbirdə əvvəlcə torpaqlarımızın azadlığı və müstəqilliyi uğrunda canından keçən şəhidlərimizin əziz xatirəsi bir dəqiqəlik sükutla yad olunub.

Sonra, 20 Yanvar həqiqətlərini əks etdirən videoçarx nümayiş etdirilib.

Görüşü GTM Qarabağ ofisinin əməkdaşı Fəridə Ağayeva açaraq 1990-cı ilin qanlı yanvar hadisələrindən danışaraq, günahsız insanlara qarşı törədilmiş vəhşicə əməllər, Azərbaycana qarşı yürüdülən çirkin siyasət, həmin o çətin dövrdə ümummilli lider Heydər Əliyevin haqq səsimizi dünyaya çatdırması yolunda göstərdiyi cəsarətdən bəhs edib.

Bildirib ki, 1990-cı ilin yanvarında baş verən hadisələr dövlət müstəqilliyinin bərpa edilməsində dönüş nöqtəsi oldu. Məhz bu faciədən sonra milli azadlıq hərəkatı tam siyasi reallığa çevrildi, dönməz xarakter aldı, xalq öz gələcəyini yalnız müstəqil Azərbaycanda gördü.

Maraqla qarşılanan məruzə ətrafında geniş müzakirələr aparılıb. Mərkəzin əməkdaş və könüllüləri 20 Yanvar faciəsinin xalqımızın tarixində silinməz izlər buraxdığını, Ali Baş Komandan İlham Əliyevin rəhbərliyi ilə 44 günlük Vətən müharibəsində xalqımızın və şanlı Ordumuzun rəşadətindən bəhs edərək, ərazi bütövlüyümüzün bərpa olunması ilə şəhidlərimizin qanının yerdə qalmadığını vurğulayıblar.