Serbiyanın Sombor şəhərində qızlar  və qadınlar arasında  boks üzrə keçirilən və Azərbaycan təmsilçilərinin də qatıldığı Millətlər Kuboku davam edir. Azərbaycan Boks Federasiyasından verilən məlumata görə, yarışların ikinci günü milli komandalarımızın 4 üzvü rinq döyüşünə cıxıb ki, onlardan da biri - Aynur Mikayılova (52 kq) daha uğurla döyüşərək finala yüksəlib. Mübarizəyə qatıldığı 1\4 finalda macarıstanlı Laura Horvatı məğlub edərək yarımfinala keçən Aynur bu mərhələdə isə Karmen Kokosu (Rumıniya) mübarizədən uzaqlaşdırmaqla həlledici finala yüksəlib -  5:0 (30:26, 30:27, 30:24, 30:27, 30:27). Aynur yanvarın 22-də baş tutacaq finalda Draqana Yovanoviçlə yumruqlaşacaq.

Böyüklərin mübarizəsinə gəlincə, Günel Rəhimova da mərhələ adlayanlar sırasında yer alıb. 48 kq çəkidə rinqə çıxan boksçumuz  1/4 finalda əlcəzairli Fatiha Mansuri ilə qarşılaşmalı olub. Lakin rəqib döyüşə gəlmədiyindən Günel döyüşsüz olaraq da yYarımfinala yüksəlib. Bununla da turnirin bürünc medalını özünə təmin edən təmsilçimiz finala gedən yolda Nikola Durikova (Slovakiya) ilə münasibətinə aydınlıq gətirəcək.

Yarşıların ikinci günü döyüşə qatılan digər boksçularımızdan Anaxanım İsmayılova (50 kq) yarımfinalda Petra Mezeiyə (Macarıstan) məğlub olub. Bu göstərici ilə o, 3-cü yeri tutmaqla bürünc medalı özünə təmin edib. Təəssüflər olsun ki, 57 kq-da döyüşən boksçumuz  Məhsəti Həmzəyeva isə 1/4 finalda Lakramioara Periyoça (Rumıniya) ilə döyüşdən məğlub ayrılıb. Sabah daha iki boksçumuz mübarizəyə qatılacaq. 

Yeri gəlmişkən, turnirdə 13 ölkəni təmsil edən 100-dən çox idmançı mübarizə aparır. Xatırladaq ki, Millətlər Kubokunun ilk günündə gənc boksçular arasında mübarizə aparan Nərmin Əlizadə (50 kq) və Aysu İsmayılova (48 kq) bürünc medala sahib olub. 

İNTİQAM Məmmədov