Masallıda şəhid ailələri və qazilərin mənzil-məişət şəraiti diqqətdə saxlanılır

Respublika Prezidenti cənab İlham Əliyev bütün dövlət qurumları qarşısında şəhid ailələrinə, müharibə veteranlarına və qazilərin problemlərinin həllini bir nömrəli vəzifə kimi müəyyən edib.

Dövlət başçısının tapşırıq və tövsiyələrinə uyğun olaraq respublikamızın hər yerində olduğu kimi Masallı rayonunda bu həssas təbəqənin nümayəndələrinə xüsusi diqqət və qayğı ilə yanaşılır.

Belə ki, ölkə rəhbərinin müvafiq sərəncamlarına uyğun olaraq, rayonun Böyuk Xocavar kəndində Birinci Qarabağ müharibəsi şəhidi Məmmədov Bəyalı İlyas oğlunun 82 yaşlı anası Mustafayeva Tahirə Rəşid qızına üç otaqlı, bir mərtəbəli ev tikilərək, 14 dekabr 2022-ci il tarixində Masallı Rayon İcra Hakimiyyəti başçısı Araz Əhmədov tərəfindən təqdim edilib.

18 yanvar 2023-cü il tarixdə Tahirə Mustafayevaya təqdim olunan evin bütün mebel və məişət əşyaları, rayonun Çaxırlı kəndində isə digər şəhid Gözəlov Ziya Zahid oğlunun yaxın günlərdə ailə həyatı quracaq bacısına cehizlik mebel və məişət əşyaları Dövlət başçısı cənab İlham Əliyev tərəfindən hədiyyə olunub.

Şəhid Ziya Gözəlovun bacısı, atası Zahid İbrahimov, şəhid Bəyalı Məmmədovun anası Tahirə Mustafayeva onlara göstərilən yüksək diqqət və qayğıya görə, Azərbaycan Respublikasının Prezidenti cənab İlham Əliyevə sonsuz minnətdarlıqlarını bildirib, rayon rəhbərliyi və aidiyyəti qurumlar tərəfindən mütəmadi olaraq ziyarət olunduqları və qayğıları ilə maraqlandıqlarını qeyd ediblər.

Akif AĞAYEV