2 boksçumuz finala çıxıb, 2-si isə bürüncü ğzünə təmin edib

Serbiyanın Sombor şəhərində qız və qadın boksçular arasında keçirilən və Azərbaycan təmsilçilərinin də qatıldığı Millətlər Kubokuna start verilib. İlin ilk beynəlxalq turnirin birinci günü Azərbaycan millisi üçün uğurlu alınıb. Belə ki, ilk gündə rinqə çıxan 5 boksçumuzdan ikisi yarımfinala çıxmaqla bürünc medalı, digər ikisi isə finala yüksəlməklə ən pis halda gümüş medalı özünə təmin edib. Azərbaycan Boks Federasiyasından verilən məlumata görə, yeniyetmələr arasında mübarizə aparan Banuçiçək Nəsieli (46 kq) yarımfinalda macarıstanlı Patrisiya Petrimanla üz-üzə gəlib və onu 4:1 (27:30, 30:27, 29:28, 30:27, 29:27) hesabı ilə məğlub edib. Bu qələbə sayəsində finala yüksələn Banuçiçək həlledici döyüşdə daha bir Macarıstan təmsilçisi  - Roksana Talpasla  döyüşəcək. Görüş yanvarın 21-də olacaq.

Gənclər arasında qüvvəsini sınayan Lalə Mədətova (48 kq) da mərhələ adlayıb. O, finala gedən yolda Briana İonitadan (Rumıniya) üstün olub – 3:2 (29:28, 28:29, 30:27, 28:29, 29:28). Mədətova yanvarın 21-də baş tutacaq həlledici görüşdə komanda yoldaşı Aysu İsmayılovaya qalib gələn rumıniyalı Mihaela Badesku ilə üz-üzə gələcək.

52 kq çəkidə çıxış edən Aynur Mikayılova da ilə qələbə ilə başlayıb. O, 1/4 finalda macarıstanlı Laura Horvatı 5:0 (29:28, 29:28, 30:27, 29:28, 30:27) hesabı ilə məğlub edərək yarımfinala yüksəlib. O, bu mərhələdə  rumıniyalı Karmen Kokosu sınağa çəkəcək.

Digər gənc boksçumuz Nərmin Əlizadə (50 kq) yarımfinalda Sanya Mitiçlə (Serbiya) qarşılaşıb və rəqib mərhələ adlayıb. Nəticədə həmyerlimiz yarışı bürünc medalla bitirib. Aysu İsmayılova (48 kq) da turniri 3-cü yerdə başa vurub.

Qeyd edək ki, 13 ölkədən 100-dən çox boksçunun qatıldığı Millətlər Kubokunun ikinci günü Azərbaycan millisinin daha 4 idmançısı mübarizəyə başlayacaq.

 İNTİQAM Məmmədov