“Ulu Öndər Heydər Əliyevin irsi milli sərvətimizdir” adlı tədbir keçirildi

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasının Uşaq şöbəsi “Zəfər yolu” Müharibə İştirakçılarına və Şəhid Ailələrinə Humanitar Dəstək İctimai Birliyi və 13 nömrəli tam orta məktəblə birlikdə “Ulu Öndər Heydər Əliyevin irsi milli sərvətimizdir” adlı tədbir keçirdilər.

Tədbirdə Dövlət himni səsləndirildi, şəhidlərin və Ulu Öndər Heydər Əliyevin əziz xatirəsi bir dəqiqəlik sükutla yad edildi.

Tədbirdə kitabxananın əməkdaşı İradə Hüseynova çıxış edərək bildirdi ki, 2023-cü il mayın 10-da Azərbaycan xalqının Ümummilli Lideri, müstəqil Azərbaycan dövlətinin qurucusu, görkəmli siyasi və dövlət xadimi Heydər Əliyevin anadan olmasının 100 illik yubileyi tamam olur. Azərbaycana rəhbərliyinin birinci dövründə Heydər Əliyev özünün qeyri-adi idarəçilik bacarığı, polad iradəsi və yüksək vətənpərvərliyi sayəsində, uzaqgörən və məqsədyönlü qərarları ilə çox qısa müddətdə respublikamızda sosial-iqtisadi, elmi-texniki və mədəni sahələrin inkişafında böyük sıçrayışa nail olmuşdur.

Tədbirdə “Zəfər yolu” Müharibə İştirakçılarına və Şəhid Ailələrinə Humanitar Dəstək İctimai Birliyinin sədri, Zəfərnew.az saytının rəhbəri, jurnalist, şair-publisist Pərvanə Abdullayeva, şəhid leytenant Mahmud Məlikovun atası Təhmasib Məlikov, veteran Ramiz Yusubov Azərbaycan Yazıçılar Birliyinin üzvü Leyla Mətin, “Zəfər yolu” Müharibə İştirakçılarına və Şəhid Ailələrinə Humanitar Dəstək İctimai Birliyinin ictimaiyyətlə əlaqələr şöbəsinin müdiri Hacıbala Əhmədov, gənc müğənni Sevinc Şuşalı, “Zəfər yolu” İctimai Birliyinin sədrinin birinci müavini Aynur Zeynallı, jurnalist Rübabə Vəliyeva və s. qonaqlar iştirak edərək XX əsr tariximizin ən qüdrətli siması olan görkəmli siyasi və dövlət xadimi Heydər Əliyevin ölkəmizin milli tərəqqi strategiyasının əsasını qoymasından, tarixi yaddaşın bərpası istiqamətindә atdığı qətiyyətli addımlardan söhbət açdılar.

Məktəbin direktoru Yaqut Sadıqova Heydər Əliyev haqqında fikirlərini bölüşdükdən sonra Zəlimxan Yaqubun şeirlərini söylədi.
 “Zəfər yolu” İctimai Birliyinin sədri Pərvanə Abdullayeva müstəqil Azərbaycanın banisi Heydər Əliyev haqqında fikirlərini bölüşdükdən sonra “Ulu Öndər Heydər baba” adlı şeirini söylədi.

“Zəfər yolu” İctimai Birliyinin birinci müavini Aynur Zeynallı Şuşaya həsr etdiyi “Yarım qalmış hekayələr” adlı kitabını Mərkəzi Kitabxanaya hədiyyə etdi.

Məktəbin direktoru Yaqut Sadıqova kitabxananın əməkdaşlarını Fəxri fərmanla təltif etdi.

Bədii hissədə 4d sinif şagirdləri “Ulu bir sərkərdə, Ulu bir Öndər” adlı mahnını ifa etdilər, 4c sinif şagirdləri tanınmış şəxsiyyətlərin Ulu Öndər Heydər Əliyev haqqında dediyi fikirləri səsləndirdilər.

3d sinif şagirdi Nuray Məmmədovanın yaratdığı Şuşa obrazı və məktəbin rəqs qrupunun rəqsləri də  maraqla qarşılandı.
Tədbirin sonunda Heydər Əliyevə həsr edilmiş videoçarx nümayiş olundu.