CAVADXAN QASIMOV:

Naxçıvanda Ümummilli lider Heydər Əliyev və Azərbaycan təhsili mövzusunda tədbir keçirilib

Naxçıvan Şəhər Gənclik Mərkəzində Ümummilli lider Heydər Əliyev və Azərbaycan təhsili mövzusunda tədbirdə iştirakımız çox gözəl təəssüratlarla yadda qaldı. Naxçıvan Muxtar Respublikasının Təhsil nazirliyinin, Naxçıvan Dövlət Universitetinin, Naxçıvan Müəllimlər İnstitutunun və "Naxçıvan" Universitetinin pedaqoji kollektivinin iştirak etdiyi tədbirdə həmin müəssisələrin rəhbərləri ilə yanaşı, ali məktəbimizin rektoru, tələbələrin sevimlisi, tarixçi alim Elbrus İsayevin də çıxışı maraqla qarşılandı.

Milli liderimiz Heydər Əliyevin xalqımız, dövlətimiz və millətimiz qarşısındakı tarixi xidmətləri, milli dövlətçilik təcrübəsi əsasında oddan alovdan xilas olub, inkişaf və tərəqqiyə qovuşan və bununla da, dünyaya Günəş kimi doğan Azərbaycan Respublikası haqqında qürurla bəhs olundu. Hazırda dövlət başçımız tərəfindən yeni keyfiyyət mərhələsində ardıcıl islahatlar müstəvisinə keçid edən ölkəmizin elm, təhsil, səhiyyə, hüquq, iqtisadiyyat, mədəniyyət, sosial sferalar və digər sahələrin şaxəli perspektivləri barəsində danışıldı. 44 günlük Vətən müharibəsini tarixi Zəfərlə bitirən ölkəmizin ərazi bütövlüyünün təmin olunmasının iftixarı bir daha qeyd olundu.

Sonra, tədbirin bədii hissəsində məktəblilərin ifasında deyilən şeirlər və digər yaradıcılıq nümunələri bütün iştirkçıların zövqünü oxşadı. Hər birimiz qürurlandıq ki, ölkəmizin gələcəyi olduqca işıqlıdır və həmin gələcək üçün çox istedadlı və savadlı gənclik formalaşır. Fürsətdən istifadə edib, həmin məktəblilərin bu tədbirə hazırlanmasında zəhmət çəkmiş olan hər kəsə minnətdarlıq edirik.